2019-08-16   608     
بزوتنەوەی گۆڕان داوا لەپارتی دیموکراتی کوردستان دهكات پشتگیری دامەزراوە نیشتمانیەکان بکات بۆ روبەڕوبونەوەی گەندەڵیو بەڕێوەبردنی کوردستان بەشێوازێکی تەندروست.
ئاوێنه: گۆڕان لەیادی دامەزراندنی پارتیدا پەیامێک ئاراستەی ئەو حزبە دەکاتو رایگهیاندووه، "بەگرنگی دەزانین پارتیو هەمو لایەنەکان پشتگیری دامەزراوە نیشتمانیەکان بکەن بۆ روبەڕوبونەوەی گەندەڵیو بەڕێوەبردنی کوردستان بەشێوازێکی تەندروست."
دەقی پەیامەکە:
بەڕێز/ سەرۆکی پارتی دیموکراتی کوردستان
بەڕێزان/ ئەندامانی مەکتەبی سیاسی
بەڕێزان/ ئەندامانی ئەنجومەنی سەرکردایەتی
بەبۆنەی ساڵڕۆژی دامەزراندنی پارتی دیموکراتی کوردستانەوە، پیرۆزباییەکی گەرم لە بەڕێزتان و سەرجەم ئەندامانی پارتی دەکەین و هیوادارین سەرکەوتووبن لەبەدیھێنانی ئامانجە نیشتمانی و نەتەوەییەکان و دەستەبەرکردنی سەقامگیری و یەکڕیزی راستەقینەو دوورخستنەوەی کوردستان لە ململانێی ناوچەیی، بەتایبەت مەترسی شەڕی ناوخۆ.
بەگرنگی دەزانین پارتی دیموکراتی کوردستان و هەموو لایەنەکانی دیکەی هەرێمی کوردستان پشتگیری پەرلەمان و سەرۆکایەتی هەرێم و حکومەت و تەواوی دامەزراوە نیشتمانیەکان بکەن بۆ رووبەڕووبوونەوەی گەندەڵی و بەڕێوەبردنی کوردستان بەشێوازێکی تەندرووست لەپێناوی پاراستنی سەروماڵی هاونیشتیمانیان و مسۆگەرکردنی دادی کۆمەڵایەتی و ژیان و گوزەرانیان.
لەسەر ئاستی هەرێمی کوردستان و حکومەتی فیدراڵی، بۆ چارەسەرکردنی قەیرانەکان بەتایبەت کەرکوک و ناوچە کێشە لەسەرەکان، بەرپرسیارێتی هەموو لایەنەکانی کوردستانە پێکەوە درێژە بە خەبات و تێکۆشانی ئاشتیانە بدەن بۆ بەدەستهێنانی مافە دەستوورییەکانی هەرێمی کوردستان و ئاساییکردنەوەی دۆخی سیاسی و ئەمنی و کارگێڕی ئەو ناوچانە بەهاوکاری و هەماهەنگی حکومەتی فیدراڵ و ھەموو ئەو لایەنانەی لە دەستووری عێراقدا هاتووە.
بزووتنەوەی گۆڕان
١٦/٨/٢٠١٩