پێشەوا هەورامانی، وتەبێژی حکومەتی هەرێمی کوردستان رایگەیاند، لیستی موچەی مانگی سێ بە پلەبەرزکردنەوەوە بۆ بەغداد دەنێردرێت.
ئاوێنە: پێشەوا هەورامانی، وتەبێژی حکومەتی هەرێمی کوردستان، ئەمشەو چوارشەممە، لەبارەی كۆبونەوەی ئەنجومەنی وەزیران، بە کەناڵ8ی راگەیاند، هەمو بڕیارەکان لەناو ئەنجومەنى وەزیران پشتیوانى کران و هیچ کەسێک لەگەڵ ئەوە نەبو موچە بەو بڕە پارەیەى لە بەغدادەوە نێردراوە دابەشبکرێت.
وتیشی، بەڵێندراوە و رێککەوتن کراوە کە موچەى هێزى پێشمەرگە و ئەوانەى دیکە کە نەنێردراوە بنێردرێت بۆ هەرێمى کوردستان سەرۆک وەزیرانی هەرێمی کوردستان لە پەیوەندى بەردەوامدا بوە لەگەڵ سەرۆکوەزیرانى عێراق و لێکتێگەیشتنى باش کراوە.
لەبارەی پلەبەرزکردنەوەی فەرمانبەران، پێشەوا هاورامانی وتی، لیستى مانگى سێی موچەی فەرمانبەران بە پلە بەرزکردنەوەوە رەوانەى بەغداد دەکرێت.