دەزگای ئاسایشی هەرێم، ئەمڕۆ پێنجشەممە، رایگەیاند، هێزەکانی بەرێوەبەرایەتی ئاسایشی ناوشاری سلێمانی بە هەماهەنگی لەگەڵ بەرێوەبەرایەتی ئاسایشی ڕۆژئاوای سلێمانی توانیان باندێکی ساغکردنەوەی دراوی ساختە دەستگیربکەن كە لە چوار كەس پێكهاتون.
ئاوێنە: دەزگای ئاسایشی هەرێم لە راگەیەندراوێكدا وتویەتی، سەرجەم ئەندامانی ئەو باندە لەچەند هەڵمەتێکدا دەستگیركراون کە لەمانگی ڕەمەزاندا دۆلاری ئەمریکی ساختەیان بە دوکاندار و فرۆشیاران داوە، لە پێناو ساغکردنەوەی پارە تەزویرەکەیان و دیناری عێراقیان وەرگرتۆتەوە.
هێمای بۆ ئەوەش كردوە كە دەست بەسەر تەواوی پارە تەزویرەكەشدا گیراوە.
بەپێی راگەیەندراوەكەی دەزگای ئاسایش، تۆمەتباران تەمەنیان لە نێوان 24 بۆ 30 ساڵاندایەو دانیشتوی شاری سلێمانی و قەزای چەمچەماڵن و لەئێستادا سەرجەم تۆمەتباران بە ماددەی 281 لەیاسای سزادانی عێراقی ڕاگیراون و لێکۆڵینەوە لەدۆسیەکانیان بەردەوامە.
دەزگای ئاسایشی هەرێم داوای لە سەرجەم هاوڵاتیان كردوە لەکاتی بونی هەر حاڵەتێکی دراوی ساختەدا، ڕاستەوخۆ پەیوەندی بکەن بە هێڵی گەرمی ئاسایش ژمارە 106.