وەزارەتی دەرەوەی هۆڵەندا هۆشداری دەداتە هاوڵاتیانی وڵاتەكەی كە بەهۆی پەرەسەندنی گرژییەكانی نێوان ئێران و ئیسرائیل، گەشت بۆ ئیسرائیل و هەرێمی كوردستان نەكەن و بڕیاریشدراوە بەشێوەیەكی كاتی كونسوڵخانەی وڵاتەكەی لە هەولێرو باڵیۆزخانەكەی لە تاران دابخات.
ئاوێنە: وەزارەتی دەرەوەی هۆڵەندا لە راگەیەندراوێكدا داوای لە هاوڵاتیانی وڵاتەكەی كردوە سەرجەم گەشتەكانیان بۆ ئیسرائیل و هەرێمی كوردستان رابگرن، ئەوەش بەخۆی پەرەسەندنی گرژییەكانی نێوان ئێران و ئیسرائیل.
هەروەها وتوشیەتی، بەهەمان هۆكار وەزارەتی دەرەوەی هۆڵەندا بڕیاریدا بە داخستنی باڵیۆزخانەی هۆڵەندا لە تاران و كونسوڵخانەی هۆڵەندا لە هەولێر بەشێوەیەكی كاتی.
بەپێی راگەیەندراوەكە باڵیۆزخانەی ئەو وڵاتە لە تاران و كونسوڵخانەكەی لە هەولێر سبەی یەكشەممە داخراو دەبن و هەر سبەینێش بڕیار لەوبارەیەوە دەدەن كە ئاخۆ بۆ دوشەممە باڵیۆزخانەكەیان لە تاران و كونسوڵخانەكەیان لە هەولێر دەكەنەوە یاخود نا.
پێشتر جۆ بایدن، سەرۆكی ئەمریكا رایگەیاند، ئێران بەمزوانە هێرش دەكاتە سەر ئیسرائیل و وتیشی، ئێمە پابەندین بە بەرگریكردن لە ئیسرائیل و یارمەتی ئەو وڵاتە دەدەین و ئێران سەركەوتو نابێت.