2019-12-09 475
ئەمڕۆ یەکشەممە ٩ی کانوونی یەکەمی ٢٠١٩، ئەنجوومەنی نوێنەرانی عێراق بۆ لێكۆڵینەوە لە رووداوی كوشتنی خۆپیشاندەران كۆبوونەوەیەكی نا ئاسایی ئەنجامدەدات.
ئاوێنه: بڕیارە ئەمڕۆ ئەنجوومەنی نوێنەرانی عێراق كۆبوونەوەیەكی نا ئاسایی ئەنجامبدات، تایبەت بە لێكۆڵینەوە لە رووداوەکانی کوشتنی خۆپیشاندەران و بۆردوومانکردنی ماڵی موقتەدا سەدر. كۆبوونەوەكە لەسەر داوای حەسەن كەعبی، جێگری سەرۆكی پەرلەمان و ژمارەیەك پەرلەمانتاری دیكەیە.
شەوی ھەینی رابردوو لە گۆڕەپانی خەللانی و نزیك پردی سنەگ ژمارەیەك چەكدار ھێرشیان كردە سەر خۆپیشاندەران و زیاتر لە ٢٥ خۆپیشاندەر كوژران و ١٣٠ دیكەش بریندار بوون. ئەمەش كاردانەوەی توندی لێكەوتەوە و باڵیۆزخانەی چەند وڵاتێكیش لە بەغداد بەیاننامەیان دژی ئەو رووداوە بڵاوكردەوە و داوای وەستاندنی توندوتیژییەكان و لێكۆڵینەوەیان لە رووداوەكە كرد.