یسرائیل كاتز، وه‌زیری ده‌ره‌وه‌ی ئیسرائیل رایگه‌یاند، سبه‌ی دوشه‌ممه‌ دۆناڵد ترامپ، سه‌رۆكی ئه‌مریكا، به‌ ئاماده‌بونی بنیامین نه‌ته‌نیاهۆ، سه‌رۆك وه‌زیرانی ئیسرائیل، له‌كۆشكی سپی مه‌رسومی داننان به‌ سه‌روه‌ریی ئیسرائیل به‌سه‌ر به‌رزاییه‌كانی جۆلان-دا ئیمزاده‌كات.

ئاوێنه‌: یسرائیل كاتز، وه‌زیری ده‌ره‌وه‌ی ئیسرائیل به‌وه‌كاله‌ت، ئه‌مڕۆ یه‌كشه‌ممه‌ له‌ تویتێكدا رایگه‌یاند"سبه‌ی دوشه‌ممه‌، دۆناڵد ترامپ، سه‌رۆكی ئه‌مریكا، به‌ئاماده‌بونی بنیامین نه‌ته‌نیاهۆ، سه‌رۆك وه‌زیرانی ئیسرائیل، مه‌رسومی داننان به‌ سه‌روه‌ری ئیسرائیل به‌سه‌ر به‌رزاییه‌كانی جۆلان-دا ئیمزا ده‌كات."

جه‌ختیشی كردۆته‌وه‌ كه‌ له‌ئێستادا ئیسرائیل و ئه‌مریكا له‌هه‌ر كاتێكی تر له‌یه‌كدی نزیكترن.

به‌رزاییه‌كانی جۆلان-ی سوریا له‌ ساڵی 1967 له‌میانی شه‌ڕی شه‌ش رۆژه‌دا له‌لایه‌ن ئیسرائیله‌وه‌ داگیركران و نه‌ته‌وه‌ یه‌كگرتوه‌كانیش ئه‌و به‌رزاییانه‌ به‌ داگیركراو ده‌زانێت.

پێشتر دۆناڵد ترامپ، سه‌رۆكی ئه‌مریكا رایگه‌یاندبو كه‌ ئێستا كاتی ئه‌وه‌یه‌ ئه‌مریكا دان به‌سه‌روه‌ری ئیسرائیل به‌سه‌ر به‌رزاییه‌كانی جۆلان-دا بنێت.