كەشناسی هەرێم پێشبینی دەكات لە 48 سەعاتی داهاتودا باران بارین بەردەوام بێت و سبەی یەكشەممەش پلەكانی گەرما چەند پلەیەك بەرزببنەوە.
ئاوێنە: بەڕێوەبەرایەتی گشتی کەشناسی و بومەلەرزەزانی ھەرێمی کوردستان لە راگەیەندراوێکدا وتی، ئەمڕۆ شەممە، ئاسمان نیمچەهەور و هەوری تەواو دەبێت، لە دوای نیوەڕۆوە لێزمە باران و هەورە بروسکەی ناوبەناو لە زۆربەی ناوچەکان بەشێوەی پچڕپچڕ بەردەوامی دەبێت و پلەكانی گەرماش نزیك دەبن لە تۆماركراوەكانی دوێنێ.
هەر بەپێی راگەیەندراوەكە، سبەی یەكشەممە، ئاسمان نیمچەهەور و هەوری تەواو دەبێت لەگەڵ ئەگەری بارینی تاوە باران لە هەندێ کات و شوێن، ریژەی دابارین لە ناوچە شاخاوییەکان زیاتر دەبێت بە بەراورد لەگەڵ سەنتەری شارەکاندا.
بەپێی قسەی كەشناسی سبەینێ پلەكانی گەرما 2 تا 3 پلە بەرزتردەبن لە تۆماركراوەكانی ئەمڕۆ.
كەشناسی هەرێم پێشبینی كردوە بەرزترین پلەکانی گەرمای پێشبینیکراو بۆ سبەی بەم جۆرە بن: ھەولێر: 25، سلێمانی: 21، دھۆک: 23، کەرکوک: 26، ھەڵەبجە: 24، سۆران: 20، گەرمیان: 29 پلە.