2020-05-31   529     
ژمارەیەک فراکسیۆنی
کوردستانی لە ئەنجومەنی نوێنەران نیگەرانی خۆیان دەردەبڕن لە شێوازی دیاریکردنی بەڕێوەبەری
گشتی نوسینگەکانی کۆمیسیۆنی باڵای هەڵبژاردنەکان بە دیاریکراویش لە هەرێم بەهۆی دەستوەردانی
حیزبییەوە.
ئاوێنە: لە بەیاننامەیەکدا هەریەکە لە فراکسیۆنەکانی
گۆڕان و یەکگرتوی ئیسلامی و کۆمەڵی ئیسلامی و ئایندە و سەربەخۆکان ئاماژە بەوە دەکەن،
کە چەندین سەرپێچی یاسایی لە دیاریکردنی بەڕێوەبەری گشتی و سەرۆک بەش و بەرپرسی ئۆفیسەکانی
کۆمیسیۆن هەیە لە هەرێمی کوردستان و دەستوەردانی حیزبی رون لەو کارەدا دەکرێت.
لە بەشێکی دیکەی
بەیاننامەکەدا کە ئاڕاستەی هەر سێ سەرۆکایەتییەکەی عێراق و نوێنەری نەتەوە یەکگرتوەکان
لە عێراق کراوە، ئەوە هاتوە "لە دیاریکردنی ئەو کەسانەدا رەچاوی بنەماکانی سەربەخۆیی
و لێهاتویی و دەستپاکی و بێلایەنی نەکراوە، بۆیە داوا دەکەین ئەو پڕۆسەیە رابگیرێت
لە هەرێمی کوردستان، چونکە بەردەوامی ئەو کارە، پێچەوانی دەستورە و دەبێتە هۆی لەدەستدانی
متمانەی خەڵک بە هەڵبژاردنەکان، هاوشێوەی ئەوەی لەدواین هەڵبژاردندا بینرا".
لە کۆتایشدا ئەو
فراکسیۆنانە جەخت دەکەنەوە لەوەی کە کار دەکەن بۆ رێککردنەوەی ئاڕاستەی کاری کۆمیسیۆنی
باڵای هەڵبژاردنەکان و پاراستنی سەربەخۆیی ئەویش لەرێگەی دابیکردنی پشتیوانی پەرلەمانی
و یاسایی و جەماوەی، بۆ پاراستنی پڕۆسەی هەڵبژادان و دوبارە نەبونەوەی سیناریۆکانی
هەڵبژاردنی ساڵی (2018) کە بوە هۆی ئەوەی هاوڵاتیان متمانەیان بە پڕۆسەی سیاسی لە
عێراق نەمێنێت.