بەڕێوەبەری تەندروستی چەمچەماڵ ئاشكرایكرد: پێنج توشبوی دیكەی كۆرۆنا لە
چەمچەماڵ تۆماركران كە چوار توشبویان دانیشتوی ناحیەی تەكیەن و توشبوەكەی دیكە
دانیشتوی ناحیەی شۆڕشە.
ئاوێنە: دکتۆر فەرهاد محەمەد، بەڕێوەبەری تەندروستی چەمچەماڵ، ئەمشەو
پێنجشەممە، لە راگەیەندراوێكدا ئاشكرایكرد: لەبەردەوامی پشکنینەکان و گەڕان بەدوای
گومانلێکراوانی ڤایرۆسی کۆرۆنا لەسنوری قەزای چەمچەماڵ، (٥) پێنج توشبو بە ڤایرۆسی
کۆرۆنا تۆمارکران.
ئاماژەی بەوەشداوە كە توشبوەكان پێكدێن لە (٢) پیاو و (٣) ئافرەت تەمەنیان
(٤٣ و ٥٠ و ٥٣ و ٥٥ و ٦٧) ساڵە.
بەپێی قسەی دكتۆر فەرهاد، چوار لە توشبوەکان دانیشتوی ناحیەی تەکیەی کاکەمەندن
و بەرکەوتوی توشبوە کۆچکردوەکەی پێشون و توشبوەکەی تریش دانیشتوی ناحیەی شۆڕشە و نیشانەکانی
ڤایرۆسەکەی تێدایە.
ئەوەشی خستۆتەڕو: لە ئێستادا سەرجەمیان لە مەڵبەندی ئاسودەی بەڕێوەبەرایەتی
تەندروستی چەمچەماڵ تایبەت بەکۆرۆنا لە ژێر چاودێریدان.