وه‌زاره‌تی نه‌وتی عێراق، ئه‌مڕۆ شه‌ممه‌، رایگه‌یاند، له‌مانگی نیسانی رابردودا بڕی 103 ملیۆن به‌رمیل نه‌وت هه‌نارده‌ كراوه‌ كه‌ داهاته‌كه‌ی زیاتر له‌حه‌وت ملیار دۆلار بوه‌.

ئاوێنه‌: عاسم جیهاد، وته‌بێژی وه‌زاره‌تی نه‌وتی عێراق له‌به‌یاننامه‌یه‌كدا رایگه‌یاند، بڕی ئه‌و نه‌وته‌ی له‌ مانگی رابردودا له‌ كێڵگه‌ نه‌وتییه‌كانی ناوه‌ڕاست و باشوری عێراقه‌وه‌ هه‌نارده‌ كراوه‌ گه‌یشتۆته‌ 100 ملیۆن و 635 هه‌زارو نۆ به‌رمیل و داهاته‌كه‌شی گه‌یشتۆته‌ شه‌ش ملیار و 819 ملیۆن و 902 هه‌زار دۆلار.

هێمای بۆ ئه‌وه‌ش كردوه‌ كه‌ هه‌ر له‌و مانگه‌دا بڕی دو ملیۆن و 570 هه‌زار به‌رمیل نه‌وت له‌ كێڵگه‌كانی كه‌ركوكه‌وه‌ بۆ به‌نده‌ری جه‌یهانی توركی هه‌نارده‌ كراوه‌و داهاته‌كه‌ی گه‌یشتۆته‌ 173 ملیۆن و 513 هه‌زارو 13 دۆلارو هه‌روه‌ها له‌ كێڵگه‌ی گه‌یاره‌شه‌وه‌ بڕی 783 هه‌زارو 598 به‌رمیل هه‌نارده‌ كراوه‌و داهاته‌كه‌ی بریتی بوه‌ له‌ 27 ملیۆن و 251 هه‌زارو 971 دۆلار.

ئاشكراشیكردوه‌ كه‌ تێكڕی نرخی یه‌ك به‌رمیل نه‌وت له‌و مانگه‌دا 67.514 دۆلار بوه‌.