د. پشدەر عەبدوڵا، بەڕێوەبەری نەخۆشخانەی منداڵانی سلێمانی دەڵێت، نەخۆشخانەكەمان پڕبوە لە نەخۆش، كامەندمان كەمە، تکایە کارمەندو پەرستارمان بۆ دابمەزرێنن.

ئاوێنە: د. پشدەر عەبدوڵا، ئەمشەو سێشەممە، لە راگەیەندراوێكدا وتویەتی"بەداخەوە نەخۆشخانە پڕ بوە لە  نەخۆش، دو هەفتەیە کارمەندان و پەرستاران هاوار ئەکەن ئەڵێن لە تواناماندا نەماوە، دو قاوشم هەیە لەبەر بێ کارمەندی ناتوانین بیانکەینەوە کە توانای وەرگرتنی بەلایەنی کەمەوە 60 نەخۆشی تریان هەیە، بە سێ کارمەند ئەبێت چارەسەری سەروی پەنجا نەخۆش بکەن."

بەڕێوەبەری نەخۆشخانەی منداڵانی سلێمانی لەبارەی ئەوەی كە پێی دەوترێت، "حەزی لە خۆدەرخستنە" بۆیە ئەوەندە لێدوان ئەدات، وتویەتی"چوار ساڵە هاوار ئەکەم ئەڵێم تکایە کارمەندو پەرستارم بۆ دابمەزرێنن، ئەڵێن حەزی لە خۆدەرخستنە، کاکە وەڵا بەڕاستمە، خەمی منداڵی ئەو خەڵکەمە کە ئێوەیان کردوە بە بەرپرسی ئەم وڵاتە، تکایە تکایە تکایە کارمەندو پەرستارمان بۆ دابمەزرێنن."

ئەو جەختیشی كردۆتەوە"لێرە بەدوا بۆ هیچ ڕاگەیاندنێک قسە ناکەم."