ئا: ئاوێنە

عەبدوڵا ئاکرەیی، بەڕێوەبەری گشتی پەیوەندییەکانی ھەرێم و ئێران لە حكومەتی هەرێم رایگەیاند، شەش مانگە هیچ هێرشێك لە ناو خاكی هەرێمی كوردستانەوە دژی ئێران ئەنجام نەدراوەو دەشڵێت: لە دوای 19ی مانگەوە برادەرانی ئێران ڕازین بە ڕێکارەکانی پاراستنی سنور لەلایەن ھەرێمی کوردستانەوە.

عەبدوڵا ئاکرەیی، بەڕێوەبەری گشتی پەیوەندییەکانی ھەرێم و ئێران لە حكومەتی هەرێم،  بەماڵپەڕی رەسمی پارتی وتوە، "ماوەی شەش مانگە ھیچ کردەوەیەک دژی ئێران لە خاکی ھەرێمی کوردستانەوە نەکراوە، ئێرانیش خۆی ئەوە دەزانێت."

بەرپرسی پەیوەندییەکانی ھەرێم و ئێران وتیشی"ئێستا لێکتێگەیشتن ھەیەو ئێرانیش ڕەزامەندە لەسەر ئەو ھەنگاوانەی نراون، ئێمەیش ڕێگە نادەین ھیچ کەسێک ببێتە مەترسی بۆ سەر دراوسێکانی ھەرێم ھەم بۆ تورکیاو ھەمیش بۆ ئێران."

عەبدوڵا ئاکرەیی ئاماژەی بۆ ئەوەکرد"ئەوەی لەتوانای ھەرێمی کوردستاندا بێت لەڕوی ئەمنییەوە ئەنجامی دەدات بۆ پاراستنی سنورەکان، لەبەر ئەوەی بازرگانی و ھاتوچۆی ھاووڵاتییانی ئێمە لەسەر سنورەکانە."

هەروەها وتوشیەتی"ھێندەی من ئاگادارم لە دوای 19ی مانگەوە برادەرانی ئێران ڕازین بە ڕێکارەکانی پاراستنی سنور لەلایەن ھەرێمی کوردستانەوە."