2019-08-07 2242
ئەندامێكی ئەنجومەنی نوێنەران داوا دەكات بۆ پەند وەرگرتن وێنەی دیكتاتۆری پێشووی عێراق لە حكومەت و پەرلەمان هەڵبواسرێت.
ئاوێنه: كازم سەیادی ئەندامی ئەنجومەنی نوێنەرانی عێراق رایگەیاند ''پێویستە وێنەی سەدام حسێن سەرۆكی رژێمی پێشوو بە كەلەپچەكراوی لە هەردوو هۆڵی ئەنجومەنی نوێنەران و ئەنجومەنی وەزیران هەڵبواسرێت''.
پەرلەمانتارەكە روونیكردەوە كە ئامانج لە داواكەی ئەوەیە وێنەكە ببێتە پەندێك بۆ لێپرسراوان و تێبگەن لەوەی دەسەڵات تاسەر بۆ هیچ كەس نامێنێت.
كازم سەیادی راشیگەیاند ''وێنەكەی سەدام وەك دیوارێك لە پەرلەمان و حكومەت دروستبكرێت بۆ ئەوەی لێپرسراوان بزانن كە دەسەڵات، ستەم و دزی بەردەوام نابن''.
سەرباری تێپپەڕبوونی زیاتر لە 16 ساڵ بەسەر گۆڕینی رژێم لە عێراقدا، بەڵام تا ئێستا وڵاتەكە بەدەست چەندین گرفتی سیاسی، ئەمنی و كەمی خزمەتگوزارییەوە دەناڵێنێت.