جێگری سەرۆكی ئەنجومەنی پارێزگای کەرکوک ڕایگەیاند، هەموو فراكسیۆن و سەرۆكی فراكسیۆنەکان دەنگیان داوە و قەحتان وەنداوییان هەڵبژارد، کە تا کۆتایی ساڵی ٢٠٢٦ لە ئەرکەکەی بەردەوام دەبێت.
ئاوێنە: نەشئەت شاهوێز، جێگری سەرۆكی ئەنجومەنی پارێزگاری لە کۆنگرەیەکی ڕۆژنامەوانییدا وتی "لە دوو دانیشتنی نائاساییدا، ئەنجوومەنەكەمان دەستلەكاركێشانەوەی پارێزگاری پێشووی قبوڵ كردووە و بە دەنگی سەرجەم فراكسیۆنەكان قەحتان وەنداوی بۆ پۆستی پارێزگار تا سەری ساڵ هەڵبژێردراوە".
ئاشکراشیکرد "حکومەتی خۆجێی كەركوك پابەندە بەو ڕێكکەوتنە سیاسیەی كە كراوە، هەموو پێكهاتەكانی شاری كەركوك مافی خۆیان هەیە، بۆ ئەو مەبەستەش ئەنجوومەنی پارێزگای كەركوك وەك ڕێزگرتنێك لە هەموو نەتەوەكانی كەركوك و مافی نەتەوەی توركمانیش، دەنگی دا بە قەحتان ونداوی، وەك پارێزگاری نوێی كەركوک".
دەربارەی وادەی کۆتایی هاتنی ئەرکی پارێزگار، جێگری سەرۆكی ئەنجومەنی پارێزگای کەرکوک ئاماژەی بەوەشکرد، هەموو فراكسیۆن و سەرۆكی فراكسۆنەكان دەنگیان داوە و قەحتان وەنداوییان هەڵبژارد، کە تا کۆتایی ساڵی ٢٠٢٦ لە ئەرکەکەی بەردەوام دەبێت.
ئەوەش لەکاتێکدایە، ئەمڕۆ شەممە دوای ئەوەی ئەنجوومەنی پارێزگای كەركوك كۆبونەوی نایاسایی خۆی ئەنجامدا بۆ ئاڵوگۆركردنی پۆستی پارێزگاری كەركووك، لە ئەنجامدا قەحتان وەنداوی، بە پارێزگاری نوێی کەرکووک هەڵبژێردرا.