بەپێی قسەی سه‌رۆكی لیژنه‌ی پێشمه‌رگه‌و ناوخۆی ‌په‌رله‌مانی كوردستان لەئێستادا حكومه‌تی هەرێمی كوردستان سه‌رقاڵی ئاماده‌كردنی پڕۆژه‌یاسای خانه‌نشینیی یه‌كگرتوه‌ و نیوه‌ی ته‌واو كردوه‌و دوای پشوی په‌رله‌مان بۆ پەسەندكردن ره‌وانه‌ی په‌رله‌مانی كوردستان ده‌كرێت.

ئاوێنە: ریڤینگ هروری، سه‌رۆكی لیژنه‌ی پێشمه‌رگه‌و ناوخۆی په‌رله‌مانی كوردستان بە ماڵپه‌ڕی رەسمی پارتی وت"له‌ هه‌رێمی كوردستان 11 به‌ڕێوەبه‌رایه‌تیی خانه‌نشینی هه‌یه‌ و هه‌موان ده‌كرێنه‌ یه‌ك به‌ڕێوەبه‌رایه‌تیی خانه‌نشینی و سه‌ربه‌ وه‌زاره‌تی دارایی ده‌بێت، بۆ ئه‌وه‌ی هیچ كه‌سێك به‌نایاسایی  خانه‌نشین نه‌بێت و هه‌ركه‌سه‌و به‌ هه‌قی خۆی خانه‌نشین بێت."

ریڤینگ هروری وتیشی"ده‌ست كراوه‌ به‌ ئاماده‌كردنی پڕۆژه‌یاسای خانه‌نشینی و نیوه‌ی ئاماده‌كراوه‌و دوای پشوی په‌رله‌مان حكومه‌ت بۆ په‌رله‌مانی ڕه‌وانه‌ ده‌كات و ده‌بێته‌ پڕۆژه‌یه‌كی خانه‌نشینیی یه‌كگرتو، هاوشێوه‌ی عێراق و له‌وێ موچه‌ی خانه‌نشینان دیاری ده‌كرێت و هه‌ركه‌سه‌و بەهه‌قی خۆی موچه‌ وه‌رده‌گرێت، ئه‌مه‌ش هه‌نگاوێكی گرنگه‌، چونكه‌ موچه‌ی خه‌یاڵیی خانه‌نشینی هه‌یه‌."