2021-02-06 481
لە بەغدا حەشدێکی نوێ دادەمەزرێت، کە لە دوو وەزارەت و ئەمینداریەتیی بەغدا و هێزی حەشدی شەعبی پێکدێت، به‌وته‌ی ئەندامێکی لیژنەی خزمەتگوزاری لە پەرلەمانی عێراقیش" ئه‌ركی ئه‌و حه‌شده جیاواز له‌وانی دیكه دابینکردنی زۆرترین کارگەکەی قیر دروستكردنه بە هەڵمەتێکی فراوانی قیرتاوکردن".
ئاوێنه: جاسم بخاتی، ئەندامی لیژنەی خزمەتگوزاری لە پەرلەمانی عێراق بە میدیا عێراقییەکانی راگەیاندووە، رێککەوتن کراوە بۆ ئەوەی حەشدێکی خزمەتگوزاریی نیشتمانی لە بەغدا دروستبکرێت، لە وەزارەتەکانی ئاوەدانکردنەوە و نیشتەجێکردن، پیشەسازی، ئەمینداریەتیی بەغدا و حەشدی شەعبی.
ئەندامەکەی لیژنەی خزمەتگوزاری ئاماژەی بەوەشكردووە، ئەرکی ئەو حەشدە، دابینکردنی زۆرترین کارگەی قیر و دەستکردنە بە هەڵمەتێکی فراوانی قیرتاوکردنی ناوچەیەکی فراوانە کە لەلایەن وەزارەتی پلادانان دانراوە و لەگەڵ شەقامە سەرەکییەکانی بەغدا.
جاسم بخاتی ڕاشیگەیاندووە، ئەمینداریەتیی بەغدا لە هەموو ناوچەکانی بەغدا دەستی بە هەنگاوەکان کردووە، بەمەبەستی چارەسەرکردنی کێشەی رێگە و بانەکان و دۆخی خزمەتگوزاریی پارێزگاکە.
ئاشكراشیكردووه، پارێزگای بەغدا نزیکەی 400 ملیار دیناری بۆ تەرخانکراوە، کە 70%یان بۆ تەواوکردنی پرۆژە وەستاوەکانە، 30٪ دیکە بۆ پەرەپێدانی رێگە و بانەکانە لە دەورووبەری بەغدا و ناوچەکان کشتوکاڵییەکان.
هاوكات نیعمە کوفی، بەڕێوەبەری ئەندازەی سەربازیی حەشدی شەعبی رایگەیاندووه، کە قۆناخی سێیەمی هەڵمەتی خزمەتگوزاریی "پایتەختەکەمان" دەست پێکردووە، کە خۆبەخشانەیە و شەقام و باخچە و گۆڕەپانە گشتییەکانی کەرخ و رەسافەی بەغدا خزمەت دەکرێن و نۆژەن دەکرێنەوە.
ئه‌وه‌شی خستووه‌ته‌روو، پێشتر لە دوو قۆناغی دیکەی هەڵمەتەکەدا رێڕەوە ئاوییەکانی بەشێک کۆڵان و شەقامەکانی بەغدایان پاککردبووەوە.
حەشدی شەعبی لە ساڵی 2014 پاڵپشت بە فتوایەکی عەلی سیستانی مەرجەعی باڵای شیعەکان دامەزرا، بەمەبەستی رووبەڕبوونەوەی داعش، دواتر لە پەرلەمان یاسای بۆ دەرکرا، بووە هێزێکی فەرمی.