بەڕێوەبەرایەتیی گشتیی گەشتوگوزاری هەولێر ئاشكرایكرد، دەستەی گەشتوگوزاری هەرێمی کوردستان خولی ڕاهێنان و ئامادەکردنی کارمەند بۆ هۆتێل و چێشتخانەو کۆمپانیاکان دەکاتەوە، ئەوەش دەكاتە مەرج كە دەبێت 30%ی کارمەندی شوێنە گەشتیارییەکان خەڵكی ناوخۆی هەرێم بن.

ئاوێنە: بەڕێوەبەرایەتیی گشتیی گەشتوگوزاری ھەولێر لەراگەیەنراوێکدا باسی لەوەشکردوە،  گشت دەرچوانی گەشتوگوزار لە زانکۆ، پەیمانگا، ئامادەیی گەشتیاری و بەشەکانی دیکەی زانکۆ و پەیمانگاکان ئاگادار دەکەنەوە کە بە ئامانجی دۆزینەوەی هەلی کار لە بنکە گەشتیارییەکانی شاری هەولێر، لەژێر ڕۆشنایی ڕێنمایی دامەزراندنی 30%ی کارمەندانی خۆماڵی لە بنکە گەشتیارییەکان، خولی ڕاهێنان و ئامادەکردنی کارمەند بۆ هۆتێل و چێشتخانە و کۆمپانیاکان دەکاتەوە.

ئاماژه‌به‌وه‌شكراوه‌، ئامانجی خولەکان بە مەبەستی ڕەخساندنی هەلی کار و دامەزراندنیانە دوای تەواوکردنی خولەکە و پێدانی بڕوانامەی باوەڕپێکراو لە گەشتوگوزاری هەولێر.

مەرجی بەشداریکردن لەخولەکان:

- خەڵکی هەرێمی کوردستان بێت

- تەمەنی لەنێوان 18 تا 35 ساڵ بێت

- دەرچوی ناوەندی بەسەرەوە بێت

- بەڵێن بدات دوای تەواوکردنی خولەکە ئامادەیی کارکردنی لە بنکە گەشتیارییەکاندا هەبێ.

گەشتوگوزاری ھەولێر وتوشیەتی، ئەو کەسەی بیەوێ ئەو دەرفەتە بەدەستبهێنێت، دەتوانێت لە ڕۆژی یەکشەممە 22 ی 8 سەردانی بەرێوەبەرایەتیی گشتیی گەشتوگوزاری ھەولێر بکات بۆ ناو تۆمارکردن.