ئەمڕۆ پێنجشەممە، ئەلینا رۆمانۆسكی، باڵیۆزی نوێی ئەمریكا لە عێراق كارنامەی خۆی پێشكەشی سەرۆك كۆماری عێراق كردو بەڕەسمی دەستبەكاربو.
ئاوێنە: بەپێی راگەیەندراوێكی سەرۆكایەتی كۆمار، بەرهەم ساڵح، سەرۆک کۆماری عێراق ئەمڕۆ پێنجشەممە، لە کۆشکی سەلام لە بەغدا کارنامەی ئەلینا رۆمانۆسکی، باڵیۆزی نوێی ئەمریکای لە عێراق وەرگرت و ھیوای سەرکەوتنی بۆ خواست لەجێبەجێکردنی کارەکانیدا، بەجۆرێک ببێتە مایەی بەھێزکردنی پەیوەندی دۆستانە و ھەماھەنگی زیاتری نێوان عێراق و ئەمریکا.
لەلای خۆیەوە باڵیۆزی نوێی ئەمریکا خۆشحاڵی خۆی نیشاندا بە کارکردن لە عێراق، ھەروەھا پابەندبونی ویلایەتە یەکگرتوەکانی ئەمریکای لە پشتیوانکردن لە ئاسایشی عێراق و ئارامی و خۆشگوزەرانی ھاوڵاتیانی عێراق دوپاتکردەوە، ھاوکات جەختیکردەوە لە پەرەپێدانی پەیوەندییەکان لەگەڵ عێراق لەبوارە جیاجیاکاندا.
ئەلینا رۆمانۆسكی، پێشتر باڵیۆزی ئەمریكا بوە لە كوەیت و بۆ ماوەی 40 ساڵ لە وەزارەتەكانی دەرەوەو بەرگری و هەروەها لە ئاژانسی ئەمریكا بۆ پەرەپێدانی نێودەوڵەتی كاری كردوە.