نوسینگەی سەرۆك وەزیرانی عێراق رایگەیاند، بەسەرپەرشتی راستەوخۆی سەرۆك وەزیرانی عێراق تاوتوێی گرنگی بەرەوپێشبردنی كەرتی نەوتكراوە و بەدواداچوونی كردوە بۆ دواین هەوڵ و دانوستان و گفتوگۆكانی نێوان هەردوو وەزارەتی نەوتی عێراق و سامانە سروشتییەكانی هەرێم.
نوسینگەی سەرۆك وەزیرانی عێراق لە راگەیەندراوێكدا بڵاویكردەوە:" محەمەد شیاع سودانی، سەرۆك وەزیرانی عێراق، بە ئامادەبوونی حەیان عەبدولغەنی، وەزیری نەوت سەرپەرشتی كۆبونەوەیەكی تایبەت بە گەشەپێدانی كەرتی نەوت كردووە و جەختی لە گەشە پێدانی زیاتری كەرتی نەوت و ئاسانكاریكردن بۆ وەبەرهێنان كردووتەوە".
ئاماژەی بەوەشكردووە:" هەروەها هەوڵەكان بۆ ئەوەی كەرتی نەوتی عیراق ببەسێترێتەوە بە هێڵە نێودەوڵەتییەكانەوە بە هەندوەرگیراون، چونكە نەوت سەرچاوەی سەرەكی داهاتە بۆ حكومەتی عێراق".
رونیشی كردووەتەوە:" محەمەد شیاع سودانی، سەرۆك وەزیرانی عێراق بەدواداچوونی كردوە بۆ دواین هەوڵ و دانوستان و گفتوگۆكانی نێوان هەردوو وەزارەتی نەوتی عێراق و سامانە سروشتییەكانی هەرێم، بەمەبەستی دەستپێكردنەوەی هەناردەی نەوتی هەرێمی كوردستان لە رێگەی بەندەری جەیهانەوە".