عەبدولباقی خەڵەف ڕاوێژکاری وەزارەتی نەوتی عێراق ئاشکرایکرد، ساڵی داهاتوو 3 پڕۆژە لەبواری وەبەرهێنانی غازدا ئەنجامدەدرێت کە لەئێستادا ڕۆژانە هەزارو 100 پێ سێجا (ملیۆن پێ سێجا ستاندارد) دەسوتێنرێت، کە 40%ی کۆی گشتیی غازی عێراق پێکدەهێنێت، ئەمەش ئاماژەیە بۆ ئەوەی عێراق پێشبینیدەکات بگاتە سفر سوتاندنی غاز پێش ساڵی 2028.

خەڵەف لەلێدونێکی ڕۆژنامەوانییدا بە"غەد پرێس"ی وتوه‌، “ئەو بڕە غازەی ڕۆژانە دەسوتێنرێت زۆر گەورەیە، بەشێوەیەک هەموو ئامێرێکی هەڵمژینی غاز زیاتر لە 50 تۆن دوەم ئۆکسیدی کاربۆن دەردەکات، هەربۆیە بڕیارە کار لەسەر ئەم بابەتە بکرێت".

ئاماژەی بەوەشکردوە، دەمێکە کاركردن لەسەر پڕۆژەکانی غاز دەستیان پێکردوە، بەڵام دۆخی ئەمنیی ڕێگر بوە لەتەواوکردنی ئەو پڕۆژانە لەناوچەکانی ڕۆژئاواو باکور، لەکاتێکدا بەشێکیشیان بەهۆی کورتهێنانی بودجەوە دواکەوتون.

ڕونیشیکردۆتەوە، عێراق پێشبینیدەکات تاوەکو پێش هاتنی ساڵی 2028 سوتاندنی غازی کێڵگە نەوتییەکانی بگاتە ئاستی سفر.

عێراق پێویستی بەزیادکردنی بەرهەمهێنانی غاز هەیە، بەوپێیەی لە ژێر فشاری زۆردایە لەلایەن ویلایەتەیەکگرتوەکان ئەمریکاوە تاوەکو لەبواری وزەدا پشت بەخۆی ببەستێت نەوەک لەئێرانەوە هاوردەی بکات، کە لەساڵی 2018وە کەوتۆتەوە ژێر گەمارۆکانی ئەمریکا.