دادگای فیدڕاڵی عێراق له‌باره‌ی هه‌ڵبژاردنی په‌رله‌مانی كوردستان بڕیاری نه‌داو دانیشتنه‌كه‌ی بۆ مانگی داهاتو دواخست.
ئاوێنه: دادگای فیدڕاڵی عێراق له دانیشتنی ئه‌مڕۆیدا له‌باره‌ی هه‌ڵبژاردنی په‌رله‌مانی كوردستان بڕیاری نه‌داو دانیشتنه‌كه‌ی بۆ 21ی (کانونی دوەم/1)ی 2024 دواخست.
سکاڵاکە لەلایەن زیاد جەبار، سەرۆکی فراکسیۆنی یەکێتیی لە خولی پێنجەمی پەرلەمانی کوردستان و ئامانج نەجیب شەمعون، سەرۆکی فراکسیۆنی ڕافیدەین لە ئەنجومەنی پارێزگای سلێمانی تۆمارکراوە، تا ئێستا دادگای فیدڕاڵی چەندینجار کۆبونەوەی بۆ بڕیاردان و یەکلاکردنەوەی سکاڵاکە خستوەتە بەرنامەی کاری دانیشتنەکانی خۆیەوە، بەڵام هەمو جارێک کۆبونەوەکە دواخراوە.
پێده‌چێت لە ئەگەری سەرگرتنی سکاڵاکە، پێنج کورسی کۆتای تورکمان و کورسییەکی کۆتای ئەرمەن هه‌ڵبوه‌شێته‌وه و سیستەمی هەڵبژاردن لە یەک بازنەییەوە بۆ فرەبازنەیی دەگۆڕێت.
دواخستنی بڕیاری دادگای فیدڕاڵی عێراق له‌كاتێكدا كه بڕیاره رۆژی 25ی (شوبات/2)ی 2024 هه‌ڵبژاردنی په‌رله‌مانی كوردستان به‌ڕێوه‌بچێت و سه‌رۆكایه‌تی هه‌رێمی كوردستان واده‌كه‌ی راگه‌یاندوه.