وەزارەتی گواستنەوەی عێراق رایگەیاند، “لەمساڵدا سیستمی گواستنەوەی گشتی لە وڵاتدا کارادەکرێت و نەینەوا وێستگەی یەکەم دەبێت و دواتریش لە پارێزگاکانی دیکە جێبەجێدەکرێت”.
مەیسەم سافی، بەڕێوەبەری نووسینگەی راگەیاندنی وەزارەتی گواستنەوەی عێراق لە لێدوانێکیدا ئاماژەی بەوە کرد، “وەزارەت بە نیازە سیستمی گواستنەوەی گشتی لە تەواوی وڵاتدا کارا بکات بە گرێبەستکردن لەگەڵ زانکۆکان و دانانی پاسی سور لە ناوەند و ناوچە گرنگەکان، جگە لە پێشکەشکردنی خزمەتگوزاری بەردەوام و کاتی تایبەت، بەمەرجێک بە سیستمی پارەدانی ئەلیکترۆنی کار بکات”.
دەشڵێت، “نەینەوا دەبێتە یەکەم وێستگە بۆ جێبەجێکردنی پڕۆژەکە و دواتر لە پارێزگاکانی دیکە بەردەوامی پێ دەدرێت، هەروەها دەمانەوێت لەمساڵدا سەرجەم خزمەتگوزاریەکانی گواستنەوەی گشتی بگۆڕین بۆ سیستمی پارەدانی ئەلیکترۆنی”.
ئەو بەرپرسەی وەزارەتی گواستنەوەی عێراق ئەوەشی ئاشکرا کرد، “گرێبەست لەگەڵ زیاتر لە زانکۆیەک لە بەغداد، نەجەف، نەینەوا، بەسرە، سەڵاحەدین و کەرکوک کراوە بە مەبەستی وەرگرتنی پاسی سور بۆ گواستنەوەی خوێندکاران بۆ ئەمساڵی خوێندن”.