محەمەد شیاع سودانی، سەرۆك وەزیرانی عێراق لەگەڵ سەرۆكی كۆمسیۆنی باڵای سەربەخۆی هەڵبژاردنەكانی عێراق كۆبوەوەو تێیدا تاوتوێی پرسی هەڵبژاردنی پەرلەمانی كوردستانیان كرد.
ئاوێنە: بەپێی راگەیەندراوێكی نوسینگەكەی، ئەمڕۆ دوشەممە، محەمەد شیاع سودانی، سەرۆك وەزیرانی عێراق پێشوازیكردوە لە سەرۆكی كۆمسیۆنی باڵای سەربەخۆی هەڵبژاردنەكان و سەرۆكی فەرمانگەی هەڵبژاردنی كۆمسیۆنەكە.
بەگوێرەی راگەیەندراوەكە، لە کۆبونەوەکەدا هەوڵ و ڕێکارەکانی کۆمسیۆن سەبارەت بە هەڵبژاردنەکانی پەرلەمانی كوردستان خرانەڕو و جەخت لە پێویستی زاڵبون بەسەر هەمو ئەو کێشانەدا كرایەوە کە ڕوبەڕوی کارەکانی کۆمسیۆن دەبنەوە، هەروەها گفتوگۆکرا لەسەر میکانیزمە یاساییەکانی تایبەت بە ئەنجامدانی هەڵبژاردنێکی ئازادو دادپەروەرانە کە هەڵبژاردنێكی شەفاف بێت و خواستەکانی گەلی كوردستان بەدی بهێنێت.