ئه‌ندامێكی په‌رله‌مانی عێراق سه‌ردانی هه‌ردو به‌ڕێوه‌به‌ری بانکه‌كانی ڕەشیدو ڕافیدەینی كردوه‌و هه‌نگاوه‌كانی پرۆسه‌ی به‌بانكیكردنی موچه‌ی موچه‌خۆرانی هه‌رێمی كوردستانی لەهه‌ردو بانكه‌كه بڵاوكردۆته‌وه.
ئاوێنه: ڕونكردنه‌وه‌ی د.بڕیار ڕشید، ئه‌ندامی په‌رله‌مانی عێراق دوای كۆبونه‌وه‌ی له‌گه‌ڵ هه‌ردو به‌ڕێوه‌به‌ری بانکه‌كانی ڕەشیدو ڕافیدەین:
بەمەبەستی بەدواداچون بۆ کردنەوەی لقەکانی لەهەرێمی کوردستان، سەردانی هەریەک لەبانکی ڕەشید و ڕافیدەین-مان کرد.
لەبەرواری (٢٠٢٤/٤/١٦ ) لەگەڵ بەڕێوبەری گشتی بانکی ڕافیدەین بەڕێز دکتۆر علی كەریم کۆبوینەوە.
دواتر لەبەرواری ( ٢٠٢٤/٤/١٨) لەگەڵ بەڕێوبەری گشتی بانکی ڕەشیـد بەڕێز محەمەد سەمیر کۆبوینەوە.
دەرئەنجامی هەردو کۆبونەوەو بەدواداچونەکانمان:
١- بۆ ئەنجامدانی به‌بانكیكردنی موچه‌ی موچه‌خۆران (توطین) بۆ هاوڵاتیانی هەرێم راستەوخۆ تەنها بە ناردنی:
ـ ناوی چواری کەسەکە
- ناوی سیانی دایک
- کارتی نیشتمانی
- کارتی زانیاری
لەڕێگەی وەزارەتی دارایی هەرێمەوە، بانکەکان دەتوانن تەوطین بکەن، واتە پێویستی بەهاتنی هاوڵاتیان خۆیان نییەو دواتریش لەڕێگەی فەرمانگـەکانیانەوە کارتەکانیان بۆ دەنێردرێتەوە و هاوڵاتیان لەهەر ئامێرێکی (ATM) یاخود دەروازیەکی پارەدارکردن ئەتوانن موچەکانیان رابکێشن.
٢- کردنەوەی لقەکانی بانکەکان بۆ کارئاسانی زیاتر و سودمەندبوونی هاوڵاتیانە لەخزمەتگوزارییەکان وەک قەرز بۆ کڕین یان دروستکردنی خانوو یان قەرز بۆ پرۆژەی جۆراو جۆر و تەواوی خزمەتگوزاریەکانی تر.
٣- کردنەوەی لقی دوو بانکی ناوبراو پێویستیان بە هەماهەنگی تەنها وەزارەتی دارایی عێراق و تۆماری خانووبەرە هەیە، چونکە لایه‌نەکانی تر وەک و وەزارەتی دارای عێراق و بانکەکان و بانکی ناوەندی هەموو ئامادەیاین تیایە.
ئەمە پێشتر بەنوسراو لاری نەبونمان وەرگرتووە.
٣- ڕاستە موڵکەکانی ڕافیدەین و ڕەشید کە لەلایەن حکومەتی هەرێم بەکاردێت و بۆ دام و دەزگای تر، بەڵام ئەمە بابەتێکی سەرەکی نییە و ڕێگرییەکی ڕاستی نییە لە کردنەوەی ئەو لقانه.
٤- ئەم موڵکانە مەرج نییە بگەڕێندرێتەوە و مەرج نییە بەتەواوی قەرەبوو بکرێتەوە بۆ ئەو دوو بانکە، تەنها لە سەرەتادا مادام خۆیان موڵکیان هەبووە و هەیە، ئەرکە لەسەر حکومەت کە موڵک (بینا)یان بۆیان دابین بکات، و ئەم بینانە ڕووبەری گەورەی پێوسیت نییە. بەڵکو تەنها لە ڕووبەری ١٥٠-٢٠٠ مەتر دەتوانن فەرعەکانیان بکەنەوە.
٥- ئەوەی کە ئەو دوو بانکە چاوەڕوانن کۆبونەوەی هاوبەش و دروستکردنی لیژنەی هاوبەشه بۆ دەستپێکردنی بەهەنگاوی کرداریی، حکومەتی هەرێم دەخەینە بەردەم بەرپرسیارێتی بەدواداچون و هەماهەنگی بۆ ئەم پرسە.
٦- بانکی رافیدەین و رەشید هەردووکی خاوەنی ئاپلیکەیشنی خۆیانن و هەموو ئەو تازەگەریانەی لە بانکی ئەهلیدا هەیە بۆ بەکارهێنەر لە شێوازی بەکارهێنان و ناردنی پارە لە ڕێگەی مۆبایلەوە و کڕین و هتد… لەم دوو بانکەشدا هەیە.
