2019-10-08   1413     
بەڕێوەبەرایەتی پۆلیسی سلێمانی بڵاویکردووەتەوە، لەگوندێكی سەر بەناحیەی سیتەك، لەباخی هاوڵاتییەكدا گۆڕێك دۆزراتەوە، كە ڕووفاتی سێ كەسی تێدابووە.
ئاوێنه: پۆلیسی سلێمانی رایگەیاند، "دوای ئەوەی هەواڵدەرێك سەردانی بنكەی پۆلیسی سیتەك دەكات كە لەكاتی هەڵكەندنی چاڵێكدا لەباخەكەیدا ئێسك و پروسكی مرۆڤی بەدی كردووە، دەستبەجێ مەفرەزەكانی بەشی پۆلیسی شارباژێڕ و ئاسایشی سنورەكە و تیمەكانی بەشی پۆلیسی بەڵگەی تاوان دەگەنە شوێنی مەبەست"
ئاماژەی بەوەشکردووە، "دوای هەڵكەندنی تەواوی گۆڕەكە دەردەكەوێت كە ئەو گۆڕە ڕوفاتی سێ كەسی تێدابووە كە جلی كوردی و پانتۆڵیان لەبەردا بووە."
راشیگەیاندووە، "هەروەها لەناو گۆڕەكەشدا سێ پارچە دراوی 50 فلسی و ناسنامەیەك دۆزراوەتەوە."
روونیشیکردووەتەوە، لەئێستادا ڕوفاتەكان ڕەوانەی پزیشكی دادوەری كراوە و لێكۆڵینەوەكان دەستیانپێكردووە .