مایك پێنس، جێگری سەرۆكی ئەمریكا لە پەیوەندییەكی تەلەفۆنیدا لەگەڵ بەرهەم ساڵح، سەرۆك كۆماری عێراق رایگەیاند، وڵاتەكەی پشتیوانی لە سەقامگیری عێراق و داخوازییەكانی هاوڵاتیان بۆ چاكسازیی دەكات و دەشڵێت، گرنگە ویستی عێراقییەكان و بژاردەكانیان بەدور لە دەستوەردانی دەرەكی رێزیان لێ بگیرێت.
ئاوێنە: بەپێی بەیاننامەیەكی سەرۆكایەتی كۆمار، ئێوارەی ئەمڕۆ دوشەممە، مایك پێنس، جێگری سەرۆكی ئەمریكا پەیوەندییەكی تەلەفۆنی لەگەڵ بەرهەم ساڵح، سەرۆك كۆماری عێراق ئەنجماداوە.
لە پەیوەندییە تەلەقۆنییەكەدا تاوتوێی دۆخی ئێستای عێراق و ناوچەكەیان بەگشتی كردوەو هەروەها گفتوگۆیان دەربارەی پەرەپێدانی پەیوەندییە دوقۆڵییەكان و پتەوكردنی هاوكاریی نێوان هەردو وڵات كردوە.
لە پەیوەندییە تەلەفۆنییەكەدا، جێگری سەرۆكی ئەمریكا پشتیوانی خۆی بۆ سەقامگیری عێراق و داخوازییەكانی هاوڵاتیانی عێراق بۆ چاكسازیی و ئاشتی و رەتكردنەوەی توندوتیژی دوپاتكردۆتەوە.
مایك پێنس ئاماژەی بە گرنگی رێزگرتن و پاراستنی خواست و بژاردەی عێراقییەكان بەدور لە دەستوەردانە دەرەكییەكان كردوە.
لەلای خۆیشییەوە، بەرهەم ساڵح جەختی لەسەر پەرۆشیان كردۆتەوە بۆ ئەوەی چارەسەركردنی دۆخی ئێستا بڕیارێكی عێراقی بێت بەدور لە دەستوەردانی دەرەكی و بەشێوەیەك كە رشتنی خوێن رابگیرێت و هاوكار بێت لە بەرزراگرتنی دەسەڵاتی یاساو دەوڵەت و مافی گوزارشت لە بۆچۆنی خۆپیشاندانی ئاشتیانە بپارێزێت.
هەروەها جەختیشی لە پشتیوانی دەزگا ئەمنی و سەربازییەكان كردۆتەوە لەوەی كە بە ئەركی نیشتمانی خۆیان هەڵسن لە پاراستنی گیانی هاوڵاتیان و ماڵوموڵكی دەوڵەت و رێگریكردن لە دەستدرێژیكردنە سەر هاوڵاتیان و ئاسایشی گشتی.