ئێوارەی ئەمڕۆ یەكشەممە، پێنج موشەكی كاتیۆشا ئاڕاستەی ناوچەی سەوز لەبەغدا كران، بەپێی قسەی سەرچاوەیەكی ئەمنی عێراقی یەكێك لە موشەكەكان بەر بینای باڵیۆزخانەی ئەمریكا كەوتوە.
ئاوێنە: سەرچاوەیەكی ئەمنی عێراقی، ئەمڕۆ یەكشەممە، بە ماڵپەڕی "سومەریەنیوز"ی راگەیاند، یەكێك لەو پێنج موشەكەی ئێوارەی ئەمڕۆ ئاڕاستەی ناوچەی سەوزی بەغدا كراون بەر بینای باڵیۆزخانەی ئەمریكا كەوتوە.
سەرچاوەكە ئامادە نەبوە وردەكاری زیاتر لەو بارەیەوە بخاتەڕو.
پێشتر شانەی راگەیاندنی ئەمنی عێراق رایگەیاند، پێنج موشەكی جۆر كاتیۆشا لە ناوچەی سەوزی بەغدا كەوتونەتە خوارەوە بەبێ هیچ زیانێك.
میدیا عێراقییەكان بڵاویان كردبوەوە كە لەكاتی كەوتنەخوارەوەی موشەكەكاندا، زەنگی ئاگاداركردنەوە لە بینای باڵیۆزخانەی ئەمریكاوە لێدراوە.