سلێمانی دەرفەتی بەشداریی چالاکییەكی ئەدەبیی نێودەوڵەتی رادەگەیەنێت
  2020-04-02       702       

سلێمانی وەك شاری داهێنەری ئەدەبیی یونسكۆ، دەرفەتی بەشداریی چالاكییەكی ئەدەبیی نێودەوڵەتی رادەگەیەنێت كە بڕیارە لە مانگی نۆی ئەمساڵ لە روسیا بەڕێوەبچێت.

ئاوێنە: پارێزگای سلێمانی، ئەمڕۆ پێنجشەممە، لە راگەیەندراوێكدا وتی: شاری ئولیانۆڤسکی ڕوسی کە یەکێکە لە ئەندامانی شارە داهێنەرەکانی ئەدەبیی یونسکۆ، پڕۆگرامی میوانداریی و مانەوەی یەک مانگیی بۆ نوسه‌ران و شاعیران و وەرگێڕان و نوسەرانی شانۆ و فیلم ڕادەگەیاند.

بەگوێرەی راگەیەندراوەكەی پارێزگای سلیمانی، بەشداربو دەبێت کتێبێک یاخود بەرهەمێکی بڵاوکراوە و چاپکراوی هەبێت و زمانی ئینگلیزی بەشێوەیەکی باش بزانێت و کارێکی ئەدەبی هەبێت کە بیەوێت لەماوەی ئەو مانگەدا کاری لەسەربکات.

ئەوەشی خستۆتەڕو كە دوا به‌روار بۆ ناوتۆمارکردن ٣٠/ ٤/ ٢٠٢٠و به‌رنامه‌که‌ له‌ مانگی ٩ی ئەمساڵدا ده‌ستپێده‌کات.

ئاشكراشیكردوە كە کۆی تێچوی میوانداریی و مانەوەی پاڵێوراو لەلایەن شاری ناوبراوەوە دابین دەکرێت.

بۆ بەشداریکردن و زانیاری زیاتر لێرە كلیك بكە.

زۆرترین بینراو
© 2020 Awene Online, Inc. All Rights Reserved.
×