2019-05-21 3401
به‌پێی بریارێكی میری قەتەر، پێنج گروپ دەتوانن لەوڵاتەكەی داوای مافی پەنابەری سیاسی بكەن‌و مانگانەش بۆ كەسی داواكار 820 دۆلار دەبڕێتەوەو خێزان‌و منداڵەكانیشی هاوكاری دەكرێن.
ئاوێنه: له‌بریاره‌كه‌ی تەمیم بن حەمەد ئال سانی، میری قەتەردا هاتووه، پێنج چین‌و توێژ دەتوانن داوای مافی پانەبەرایەتی سیاسی لەوڵاتەكەیان بكەن، ئەوانیش بریتیین لەمافپەروەر، پەیامنێرو رۆژنامەنووس، كەسانی سیاسی‌و لایەنی ئاینی، نوسەرو لێكۆڵەر لەگەڵ بەرپرسی ئێستا یان پێشو، بەڵام بەو مەرجەی ھەڕەشەی لێكرابێت.
بڕیارەكەی میری قەتەر كە لەمانگی ئەیلولی ساڵی رابردو دەركراوە، بەڵام لەرۆژی یەكشەممە 19ی ئەم مانگە رۆژنامەی فەرمی بڵاویكردۆتەوە.
بەگوێرەی بڕیارەكە ئەو كەسەی مافی پانەبەرایەتی سیاسی لەقەتەر وەربگرێت، مانگانە 820 دۆلار بەخۆی‌و 220 دۆلاریش بۆ ھاوسەرو ھەر منداڵێكی دەدەرێت تا ئەو كاتەی كارێكی گونجاو دەدۆزێتەوە.
ئەو كەسانەشی ئەو مافەیان پێدەدرێت جگە لەدامەزراوە ئەمنییەكان دەتوانێت لەھەموو دامەزراوەیەكی ئەو وڵاتە كار بكات‌و شوێنی نیشتەجێبون‌و بیمەی تەندروستی‌و خوێندنی بۆ دەستەبەر دەكرێت.