ئا: ئاوێنە
بریکاری پێشووی وەزارەتی دارایی عێراق لە سیمینارێکدا رایگەیاند، بەشێک لەو کێشە داراییانەی بە درێژایی پەیوەندییەکانی هەرێم و بەغدا دووچاری هەرێم بووەتەوە بەهۆی وەزیری پێشووی سامانە سروشتییەکانی هەرێمەوە بووە و وتیشی، "لە یەکێک لە کۆبوونەوەکان خەریک بوو پەلاماری بدەم".
فازڵ نەبی، بریکاری پێشوی وەزارەتی دارایی عێراق لە تۆڕی ناوەندی رۆشنگەری چاودێر سیمینارێکی لە بارەی مێژووی دەربارەی پەیوەندییە داراییەکانی نێوان هەرێم و بەغدا پێشکەشکرد.
لە سیمینارەکەدا فازل نەبی رایگەیاند، لە ماوەی 20 ساڵی رابردوو هۆکاری زۆربەی چارەسەرنەکردنی کێشە داراییەکان خودی حکومەتی هەرێم خۆیبووە، چونکە نەیتوانییەوە رێککەوتنی نووسراو و کۆنکرێتی لەگەڵ بەغدا بکات.
ئاماژەی بەوەشکرد، بەشێک لەو کێشە داراییانەی دووچاری هەرێم بووەتەوە لە ئەستۆی ئاشتی هەورامی، وەزیری پێشووی سامانە سروشتییەکانە و دەشڵێت، "لە یەکێک لە کۆبوونەوەکان ویستم پەلاماری بدەم".
ئاشتی ھەورامی، لە کابینەکانی پێنجەم و شەشەم و حەوتەم و ھەشتەمی حکومەتی ھەرێمی کوردستان وەزیری سامانە سروشتییەکان بوو و چەندان جار لەلایەن پەرلەمانتاران و چاودێرانیشەوە بە گەندەڵی تۆمەتبار کراوە، فازل نەبیش لە هەمان ماوەدا بریکاری وەزارەتی دارایی عێراق بووە.