بەگوێرەی ئاماری کۆمپانیای سومۆ، لەمانگی ئەیلولدا بڕی 103 ملیۆن و 143 هەزار بەرمیل نەوت فرۆشراوە و داهاتەکەی 9.49 ملیار دۆلار بوە، واتە بەراورد بە مانگی پێشوتر داهاتی نەوت نزیکەی 500 ملیۆن دۆلار زیادیکردوە.
ئاوێنه: وەزارەتی نەوتی عێراق لەراگەیەنراوێکدا بڵاویکردەوە، بەپێی ئاماری کۆمپانیای بە بازاڕکردنی نەوتی عێراق "سومۆ"، لە ماوەی مانگی 9 بڕی 103 ملیۆن و 143 هەزار بەرمیل نەوت فرۆشراوە و داهاتەکەی 9.49 ملیار دۆلار بوە.
ئاماژە بەوەشکراوە، لە ماوەی مانگی ئەیلول بڕی 102 ملیۆن و 220 هەزار بەرمیل نەوت لە کێڵگە نەوتییەکانی باشور و ناوەڕاستی عێراقەوە هەناردەکراوە، لە کێلگە نەوتییەکانی گەیارەشەوە بڕی 473 هەزار بەرملیل نەوت هەناردەکراوە.
ئەوەش خراوەتەڕو، نرخی ناوەندی یەک بەرمیل نەوت 92.05 دۆلار بوە، لەرۆژێکدا بڕی 3 ملیۆن و 483 هەزار بەرمیل نەوت هەناردەکراوە.
بەگوێرەی ئاماری کۆمپانیای سومۆ، داهاتی نەوت عێراق لەمانگی ئابدا هەشت ملیار و 997 ملیۆن دۆلار بو، وە بڕی 106 ملیۆن و 122 هەزار بەرمیل نەوت بە 35 کۆمپانیای جیهانی فرۆشرا.