ئەنجومەنی باڵای كۆمەڵی دادگەری رایگەیاند، لەگەڵ بەڕێوەچونی هەڵبژاردنی پەرلەمانی كوردستاندان لەو وادەیەی كە سەرۆكی هەرێم دیاریكردوەو خوازیارن هیچ هیچ لەمپەرو ڕێگرییەک نەخرێتە بەردەم ئەنجام دانی پرۆسەكەو دەشڵێت، هەرجۆرە ئینكارییەک لەبەردەم جێبەجێکردنی بڕیارەکانی دادگای فدراڵیدا دورنییە ببێتە مایەی لەدەستدانی چوارچێوە دەستوری و یاساییەکەی هەرێم.

ئاوێنە: ئەنجومەنی باڵای كۆمەڵی دادگەریی كوردستان، ئەمڕۆ سێشەممە، لە راگەیەندراوێكدا وتی"زیاتر لە هەفتەیەكە وەزارەتی دارایی فیدراڵ، پارەی پێویستی بۆ موچەی فەرمانبەران ناردوە، بەڵام بە بڕیارێكی چاوەڕوان نەکراو لەلایەن حكومەتی كاربەڕێكەری هەرێمەوە دەستی بەسەرداگیراوە، لەكاتێكدا دەتوانێت لەگەڵ داهاتی ناوخۆ موچەی هەمو موچەخۆرانی دابەشبكردایە."

لەبارەی پرسی هەڵبژاردنی پەرلەمانی کوردستانیش وتویەتی"ئێمە لە كۆمەڵی دادگەریی كوردستان لەگەڵ بەڕێوەچونی هەڵبژاردنداین لەو كاتەی كە سەرۆكی هەرێمی كوردستان دیاریكردوەو هیوادارین هیچ لەمپەرو ڕێگرییەک نەخرێتە بەردەم ئەنجام دانی پرۆسەكە."

ئەنجومەنی باڵای كۆمەڵی دادگەری جەختی كردۆتەوە كە "هەر جۆرە ئینكارییەک کە وەستان بێ لەبەردەم جێبەجێکردنی بڕیارەکانی دادگای فدراڵیی دا هەرێمی كوردستان ڕوبەڕوی قەیرانی زیاتردەکاتەوەو دورنییە چوارچێوە دەستوری و یاساییەکەی هەرێم لەدەست بدەین."

دەقی راگەیەندراوەكە:  

ڕاگەیەندراوێك لە كۆمەڵی دادگەریی كوردستانەوە

بەناوی خوای بەخشندەی میهرەبان

حوكمڕانی خراپ و پڕ گەندەڵیی  و بێباكیی دەسەڵاتدارەكانی كارێكی كردوە كە ڕۆژ بە ڕۆژ قەیران و گرفتەكان زیاترو مەینەتییەكانی خەڵكیش زۆرتردەبن.

زیاتر لە هەفتەیەكە وەزارەتی دارایی فیدراڵ، پارەی پێویستی بۆ موچەی فەرمانبەران ناردوە، بەڵام بە بڕیارێكی چاوەڕوان نەکراو لەلایەن حكومەتی كاربەڕێكەری هەرێمەوە دەستی بەسەرداگیراوە، لەكاتێكدا دەتوانێت لەگەڵ داهاتی ناوخۆ موچەی هەمو موچەخۆرانی دابەشبكردایە.

دەبو ئەم دەسەڵاتە ئەوەندە هەستی بەرپرسیارێتی هەبوایە كە لەم مانگی ڕەمەزاندا دەستی بەسەر ژیان و گوزەرانی خەڵكدا نەگرتایە كە تاكە سەرچاوەی ژیانی ئەو موچەیەیە.

تایبەت بەپرسی هەڵبژاردنی پەرلەمانی کوردستانیش، ئێمە لە كۆمەڵی دادگەریی كوردستان لەگەڵ بەڕێوەچونی هەڵبژاردنداین لەو كاتەی كە سەرۆكی هەرێمی كوردستان دیاریكردوەو  هیوادارین هیچ لەمپەرو ڕێگرییەک نەخرێتە بەردەم ئەنجام دانی پرۆسەكە.

هەرجۆرە ئینكارییەک کە وەستان بێ لەبەردەم جێبەجێکردنی بڕیارەکانی دادگای فدراڵیی دا هەرێمی كوردستان ڕوبەڕوی قەیرانی زیاتردەکاتەوە و دورنییە چوارچێوە دەستوری و یاساییەکەی هەرێم لەدەست بدەین.

کۆمەڵی دادگەری کوردستان

ئەنجومەنی باڵا