ئاری هه‌رسین، به‌رپرسی لقی 4ی پارتی دیموكراتی كوردستان رایگه‌یاند، كاتێك كه باسی كورد ده‌كرێت ده‌بێت ئه‌وه له‌بیر بێت كه كورد ده‌وڵه‌تی نییه و "ده‌وڵه‌تانی دراوسێ وه‌كو برا بچوك و كۆیله سه‌یری كورد ده‌كه‌ن"، ده‌شڵێت، "زانیاریمان هه‌یه كه ئه‌نجامی هه‌ڵبژاردنی په‌رله‌مانی كوردستان ده‌ستكاری ده‌كرێت".
ئاری هه‌رسین ئه‌مڕۆ چوارشه‌ممه له‌میانی پانێڵێكدا له په‌یمانگه‌ی ته‌كنیكی كوردستان، له‌باره‌ی په‌یوه‌ندیه‌كانی نێوان هه‌ولێر و به‌غدا، رایگه‌یاند، "بڕیاره‌كانی دادگای نافیدڕاڵی ناده‌ستوری به موئمامه‌ره ده‌زانین كه دیزاینه‌كه‌ی له ناوه‌وه و ده‌ره‌وه‌ی عێراق كراوه و ده‌یانه‌وێت جێبه‌جێی بكه‌ن".
ئاماژه‌ی به‌وه‌شكرد، ناوچه‌كه "ده‌كوڵێت له دۆخی سیاسی" كاتێك كه باسی كورد ده‌كرێت ده‌بێت ئه‌وه له‌بیر بێت كه كورد ده‌وڵه‌تی نییه و "ده‌وڵه‌تان وه‌كو برا بچوك و كۆیله سه‌یری كورد ده‌كه‌ن و به كورد ره‌وا نابینرێت كه له هه‌رێمی كوردستاندا خاوه‌نی كیانی خۆی بێت".
ئاری هه‌رسین باسی له‌وه‌شكرد، "له‌دوای وه‌فاتی مامجەلال حەرەکاتی شۆڤێنی بەرامبەر کورد سێ بۆ چوار هێنده زیاتربو، 13 ساڵ له‌مه‌وبه‌ر جه‌نابی سه‌رۆك بارزانی وتارێكیدا وتی خه‌ڵكی كوردستان موئامه‌ره‌یه‌ك له رێگه‌یه و ده‌بێت ئاگامان له خۆمان بێت، ئه‌وه‌بو ساڵی 2014 به‌بێ ئه‌وه‌ی ریفراندۆم بكات میزانییه‌ی هه‌رێمی كوردستان بڕدرا".
له‌دوای پانێڵه‌كه‌ش له لێدوانێكدا بۆ رۆژنامه‌نوسان له‌باره‌ی هه‌ڵبژاردنه‌وه وتی، "زانیاریمان هه‌یه كه ئه‌نجامی هه‌ڵبژاردن ده‌ستكاری ده‌كرێت و له ئێستاوه تیمی پڕۆفیشناڵ له هه‌رێمی كوردستان هه‌ن و ده‌ستكاری ئه‌نجامه‌كانی كۆمسیۆنی باڵای هه‌ڵبژاردن ده‌كه‌ین و پێمانوایه ئه‌مه موئامه‌ره‌یه له دژی هه‌رێمی كوردستان".