لە چوارچێوەی هەوڵەکان بۆ پتەوکردنی پەیوەندییە دووقۆڵییەکان، ئەمڕۆ سێشەممە (16ی حوزەیرانی 2026)، عەلی فالح زەیدی، سەرۆک وەزیرانی عێراق و تۆم باراک، نێردەی تایبەتی سەرۆکی ئەمریکا دۆناڵد ترەمپ، راگەیەندراوێکی هاوبەشیان بڵاوکردەوە. تێیدا جەخت لە بونیادنانی هاوبەشییەکی ستراتیژیی تۆکمە کراوەتەوە کە خزمەت بە بەرژەوەندییەکانی هەردوو وڵات بکات و ببێتە هۆی چەسپاندنی سەروەری، ئاسایش و گەشەی ئابووری لە عێراقدا.
ئاوێنە: لە رووی دیپلۆماسییەوە، راگەیەندراوەکە ئاشکرای کردووە کە دۆناڵد ترەمپ، سەرۆکی ویلایەتە یەکگرتووەکانی ئەمریکا، بە فەرمی بانگهێشتی عەلی فالح زەیدی کردووە بۆ ئەوەی لە ناوەڕاستی مانگی تەمموزی داهاتوودا سەردانی کۆشکی سپی بکات، تاوەکو لە نزیکەوە نەخشەڕێگای داهاتووی پەیوەندییەکانی نێوان بەغدا و واشنتۆن تاوتوێ بکەن.
پرسی ئەمنی و قۆرخکردنی چەک
تەوەرێکی سەرەکیی راگەیەندراوەکە تایبەت بووە بە دۆخی ناوخۆیی و ئەمنیی عێراق. لەم رووەوە، حکومەتی عێراق نەخشەپلانێکی راگەیاندووە بۆ چەککردن و هەڵوەشاندنەوەی سەرجەم ئەو گروپ و هێزە چەکدارانەی کە لە دەرەوەی چوارچێوەی دەزگا فەرمییەکانی دەوڵەتن. ئامانجی سەرەکیی ئەم بڕیارە، هێشتنەوەی چەکە تەنها لە دەستی دامەزراوە حکومییەکان و چەسپاندنی سەروەریی تەواوەتییە، بە جۆرێک کە عێراق لە ململانێ هەرێمییەکان بەدوور بگیرێت و رێگە نەدرێت خاکی ئەم وڵاتە ببێتە سەرچاوەی هەڕەشە بۆ سەر ئاشتی و ئاسایشی ناوچەکە.
کرانەوەی ئابووری و وەبەرهێنانی ئەمریکی
لەسەر ئاستی ئابووری، سەرۆک وەزیرانی عێراق گرنگییەکی زۆری بە فراوانکردنی پەیوەندییە بازرگانییەکان و هاندانی وەبەرهێنانی بیانی داوە. بۆ ئەم مەبەستەش چەندین هەنگاوی کرداریی راگەیەندراون، کە بریتین لە:
- کەرتی تەکنەلۆژیا: پێدانی مۆڵەتی فەرمی بە کۆمپانیای ستارلینک (Starlink) بۆ دابینکردنی خزمەتگوزاریی ئینتەرنێتی خێرا لە سەرتاسەری عێراقدا.
- کەرتی نەوت و وزە: دەستپێکردنی دانوستانی راستەوخۆ لەگەڵ کۆمپانیای زەبەلاحی شیڤرۆن (Chevron) بە مەبەستی پەرەپێدان و وەبەرهێنان لە هەردوو کێڵگەی نەوتی (رۆژئاوای قورنە-2) و (ناسریە).
- گەڕانەوەی کۆمپانیاکان: رێککەوتن لەسەر گەڕانەوە و دەستپێکردنەوەی کارەکانی هەریەک لە کۆمپانیا ئەمریکییەکانی (HKN، Western Zagros، Hunt)، لەژێر سایەی دابینکردنی گەرەنتی و پاراستنی ئەمنی بۆیان.
- هێڵی بۆریی ستراتیژی: ئامادەکاری بۆ واژۆکردنی یاداشتێکی لێکتێگەیشتن لەگەڵ کۆمپانیای (TI Capital) بۆ نۆژەنکردنەوەی هێڵی بۆریی نەوتی ستراتیژیی (کەرکوک - بانیاس)، کە رێڕەوێکی جێگرەوە و گرنگە بۆ هەناردەکردنی نەوتی عێراق.
لە کۆتایی راگەیەندراوەکەدا، نوێنەرانی بەغدا و واشنتۆن پشتیوانیی تەواوی خۆیان بۆ مانەوەی عێراق بە یەکگرتوویی، فیدراڵی و دیموکراسی دووپاتکردووەتەوە. هەروەها جەختیان لەوە کردووەتەوە کە پێویستە لە رێگەی دامەزراوە دەستوورییەکانەوە یەکسانی بۆ سەرجەم هاوڵاتیانی عێراق دەستەبەر بکرێت، کە ئەمەش دەبێتە فاکتەرێکی بەهێز بۆ سەقامگیریی زیاتری ناوچەکە.