وه‌زاره‌تی ناوخۆی عێراق رایگه‌یاند، تۆمه‌تبارێكی دیكه‌ی دۆسیه‌ی عه‌دنان جومه‌یلی له پارێزگای سه‌ڵاحه‌دین ده‌ستگیركراو ده‌ستیش به‌سه‌ر زیاتر له سێ ملیۆن دۆلاری ئه‌مریكی و 750 ملیۆن دیناری عێراقیدا گیرا.
ئاوێنه: وه‌زاره‌تی ناوخۆی عێراق، پاشنیوه‌ڕۆی ئه‌مڕۆ دوشه‌ممه، له راگه‌یه‌ندراوێكدا وتی، "مەفرەزەکانی ئاژانسی هەواڵگری و لێکۆڵینەوەی فیدراڵی لە پارێزگای سەڵاحەدین یەکێک لە تۆمەتبارانی تۆڕی گەندەڵی سەر بە تۆمەتبار عەدنان جومەیلی-یان ده‌ستگیركردو دەستیشیانگرت بەسەر زیاتر لە سێ ملیۆن دۆلاری ئەمریکی و زیاتر لە 750 ملیۆن دیناری عێراقیدا."
وتوشیه‌تی، هه‌روه‌ها دەستیش بەسەر کۆمەڵێک چەک و تەقەمەنی سوک، ئۆتۆمبێلی مۆدێل بەرز و گرێبەستی حکومیدا گیرا لەناو ماڵی تۆمه‌تباره‌كه‌دا.
وه‌زاره‌ته‌كه داوای له هاوڵاتیان كردوه كه دودڵ نەبن لە ئاگادارکردنەوەیان له هەر حاڵەتێکی گەندەڵی، یان خراپ بەکارهێنانی پێگەی وەزیفی، یاخود دەستکەوتی نایاسایی کە لە ناوچەکانیان و فەرمانگەکانیان بەدی دەکەن و وتویه‌تی"ئه‌وه‌ش بزانن کە زانیاری و ئاگادارکردنەوەکانتان لەلایەن لایەنە ئەمنی و دادوەرییەکانەوە بە نهێنی و ئه‌مانه‌تیی ته‌واوه‌وه مامەڵەی لەگەڵدا دەکرێت."