نوری مالیکی، سەرۆکی هاوپەیمانی دەوڵەتی یاسا، لە چاوپێکەوتنێکی تەلەفزیۆنیدا هەڵسەنگاندنێکی ڕەخنەیی بۆ دۆخی گەندەڵی لە کابینەکەی محەمەد شیاع سودانی خستەڕوو. مالیکی ئاماژەی بەوە کرد کە ئاستی گەندەڵی لەم قۆناغەدا بە جۆرێک پەرەی سەندووە، کە بە تێڕوانینی ئەو ناوی «فەرهود» یان تاڵانیی لێ دەنرێت، نەک تەنها گەندەڵی بە مانای نەریتی.
ئاوێنە: مالیکی لە درێژەی قسەکانیدا ڕایگەیاند کە سەرۆک وەزیران بەڵێنی ڕووبەڕووبوونەوەی گەندەڵیی دابوو، بەڵام واقیعەکە پێچەوانەی خواستی سەرەتایی بووە. ئەو بە ڕاشکاوی وتی: "گەندەڵی تەنها لە کەیسی عەدنان جومەیلی-دا کورت نابێتەوە؛ ئەو تەنها ئەو کەسەیە کە تا ئێستا ئاشکرا بووە، لە کاتێکدا ژمارەیەکی زۆر لەو جۆرە کەسانە لە کەرتە گرنگ و هەستیارەکاندا، بەتایبەت لە کەرتی کارەبا و بەندەرەکان و بوارەکانی دیکەدا بوونیان هەیە."
سەرۆکی هاوپەیمانی دەوڵەتی یاسا، وێڕای داننان بەوەی کە گەندەڵی لە هەموو حکومەتەکانی پێشوودا بوونی هەبووە و دیاردەیەکی جیهانییە، بەڵام جەختی کردەوە کە ئەو دۆخەی ئێستا بە «تەقینەوەیەکی مەترسیداری گەندەڵی» وەسف دەکات.
مالیکی لە کۆتایی لێدوانەکەیدا جەختی لەسەر ئەوە کردەوە کە ئەو شێوازەی گەندەڵی کە لەم قۆناغەدا ڕوویداوە، لە مێژووی حکومەتەکانی عێراقدا بێ وێنە و بێ پێشینەیە و پێویستی بە هەڵوێستەیەکی جددی هەیە.