ئەمڕۆ هەینی، ١٠ی تەمووزی ٢٠٢٦، ئەبوحوسێن حەمیداوی، ئەمینداری گشتیی کەتائیبی حزبوڵای عێراق، لە ڕاگەیەنراوێکی فەرمیدا هەڵوێستی ڕێکخراوەکەی سەبارەت بە دۆخی سیاسی و پەیوەندییان لەگەڵ حکوومەتی عێراق ڕاگەیاند.
ئاوێنە: حەمیداوی لە پەیامەکەیدا جەختی لەوە کردەوە کە کەتائیبی حزبوڵا بە بڕیار و ڕاسپاردەی ڕابەری کۆچکردووی ئێران، عەلی خامنەیی، دامەزراوە و هەتا ئێستاش بە هەمان ستراتیژی و ئاراستەی سەرەتایی خۆیان بەردەوامن. ناوبراو مەراسیمی بەخاکسپاردنی خامنەیی لە عێراق وەک بەڵگەیەک بۆ پشتیوانیی جەماوەری لەو ڕێبازە دەبینێت و پێی وایە ئەمە شەرعییەتی مانەوەی ئەوان و پەیڕەوکردنی ئەو سیاسەتانە دەسەلمێنێت.
لە بەشێکی تری پەیامەکەیدا، ئەبوحوسێن حەمیداوی کە ناوی لە لیستی تیرۆری ئەمریکادا هاتووە، ڕووی دەمی دەکاتە سەرکردە سیاسییەکان و بەرپرسانی باڵای حکوومەتی عێراق و دەڵێت: "سەرنجی هەموو لایەک بۆ ئەوە ڕادەکێشین کە پێویستە لە ئاراستەی 'موقاوەمە' لانەدەن، چونکە لە داهاتوودا هیچ پەشیمانییەک سوودی بۆ ئەو کەسانە نابێت کە لەم ڕێبازە لادەدەن."
ئەم پەیامە لە کاتێکدایە کە یەکێک لە ئەولەویەتەکانی کارنامەی کابینەی عەلی زەیدی، بریتییە لە ڕێکخستنەوەی چەکی میلیشیاکان و خستنەژێر چەتری دەوڵەتەوە. سەرەڕای ئەوەی هەندێک گرووپی چەکدار ئامادەیی خۆیان بۆ هەماهەنگی لەگەڵ ئەم هەنگاوە نیشانداوە، بەڵام کەتائیبی حزبوڵا، نوجەبا و سەید شوهەدا هێشتا بە ئاشکرا ڕەتی دەکەنەوە چەک دابنێن یان بێنە ژێر ڕکێفی ڕاستەوخۆی دەسەڵاتی سەربازیی حکوومەتەوە.
چاودێران پێیان وایە، ئەم لێدوانەی حەمیداوی ئاماژەیە بۆ قوڵبوونەوەی ئەو گرژییانەی لە نێوان گرووپە چەکدارەکان و حکوومەتی عێراقدا هەیە، بەتایبەت لەو پرسەدا کە پەیوەندی بە دەسەڵاتی تاکڕەوای دەوڵەت لە بەکارهێنانی هێزدا هەیە.