ئەمڕۆ یەکشەممە، حەیدەر عەبوودی، وتەبێژی حکومەتی عێراق ڕایگەیاند، عەلی زەیدی، سەرۆک وەزیرانی عێراق، سبەی دووشەممە بە سەردانێکی فەرمی بەرەو واشنتۆنی پایتەختی ئەمریکا بەڕێدەکەوێت.
ئاوێنە: عەبوودی لە کۆنفرانسێکی ڕۆژنامەوانیدا جەختی لەوە کردەوە کە ئەم سەردانە لەم کاتە هەستیارەی ناوچەکەدا گرنگییەکی ستراتیژیی هەیە و ئامانج لێی پەرەپێدانی پەیوەندییە دەرەکییەکانە لەسەر بنەمای بەرژەوەندیی هاوبەش. ناوبراو ئاماژەی بەوە کرد کە ئەم سەردانە بەشێکە لە بەرنامەی حکومەت بۆ بەهێزکردنی پەیوەندییەکان لەگەڵ ئەمریکا، بەتایبەت لە ڕووی ئابووری و وەبەرهێنانەوە.
تەوەرە سەرەکییەکانی سەردانەکە:
- ئابووری و وزە: سەرۆک وەزیران زنجیرەیەک دیداری لەگەڵ دۆناڵد ترەمپ، سەرۆکی ئەمریکا و بەرپرسانی دامەزراوە دارایی و ئابوورییەکان دەبێت.
- مۆدێلی نوێی پەیوەندی: گواستنەوەی پەیوەندیی نێوان هەردوو وڵات لە "بەڕێوەبردنی قەیرانەکان" بەرەو "شەریکی ئابووریی درێژخایەن".
- پڕۆژەی ستراتیژی: واژۆکردنی یاداشتنامەی لێکتێگەیشتن لە سێکتەرەکانی نەوت و گاز، لەگەڵ ڕاگەیاندنی "سندوقی عێراقی-ئەمریکی بۆ گەشەپێدان و وزە".
- ئاسایشی وزە: هێنانی کۆمپانیا ئەمریکییەکان بۆ عێراق بەمەبەستی بەرزکردنەوەی توانای بەرهەمهێنانی نەوت و کەمکردنەوەی پشت بەستن بە "گەرووی هورمز" وەک تەنها دەروازەی هەناردەکردن.
وتەبێژی حکومەت ڕایگەیاند، ئەم سەردانە جیاوازە لەوانەی پێش خۆی، چونکە چەقی سەرەکییەکەی ئابوورییە. سەبارەت بە لایەنی سیاسی و یاسایی، عەبوودی جەختیکردەوە کە هیچ گۆڕانکارییەک بەسەر "رێککەوتنامەی چوارچێوەی ستراتیژی"دا نایەت و هەموو تێگەیشتنە نوێیەکان لەو چوارچێوەیەدا دەبن. هەروەها ئاماژەی بەوەش کرد کە دۆسیەی کۆنترۆڵکردنی چەک لەلایەن دەوڵەتەوە، هەنگاوێکی گرنگە بۆ زامنکردنی ژینگەیەکی لەبار بۆ وەبەرهێنان و سەقامگیریی ناوخۆ.