وه‌زاره‌تی كاره‌بای عێراق رایگه‌یاند، راگرتنی به‌رهه‌مهێنانی غاز له كێڵگه‌ی كۆرمۆری هه‌رێمی كوردستان له‌لایه‌ن كۆمپانیای دانه غاز، بوه هۆی كه‌مبونه‌وه‌ی كاره‌بای نیشتمانی له عێراق.
ئاوێنه: وه‌زاره‌تی كاره‌بای عێراق، ئێواره‌ی ئه‌مڕۆ پێنجشه‌ممه، له راگه‌یه‌ندراوێكدا وتی، ئاگادارکردنەوەیەکیان لە لایەنە پەیوەندیدارەکانەوە پێگەیشتوە سەبارەت بە ڕاوەستانی دابینكردنی غاز لە کێڵگەی دانه‌عاز لە هەرێمی کوردستان، بەهۆی ئەو بارودۆخە ئەمنییەی کە ناوچەکە بەخۆیەوەی بینیوە.
وتوشیه‌تی، ئەم بابەتەش لەوانەیە ببێتە هۆی لەدەستدانی نزیکەی 1400 مێگاوات لە توانای بەرهەمهێنانی سیستمی کارەبای نیشتمانی، لە حاڵەتی بەردەوامبونی ڕاوەستانی دابینكردنی غازدا.
وەزارەته‌كه جەختی کردۆتەوە کە دەستییان کردوە بە گرتنەبەری سەرجەم ڕێکارە تەکنیکی و کارپێکردنە پێویستەکان و پلانێکی فریاگوزارییان بۆ بەڕێوەبردنی سیستمی کارەبا ئامادەکردوە، ئەویش لە ڕێگەی سەرلەنوێ دابەشکردنەوەی لۆده‌كان و بەکارهێنانی سەرجەم یەکە بەرهەمهێنەرە بەردەستەکان، بە ئامانجی کەمکردنەوەی کاریگەری ئەو کورتهێنانە پێشبینیکراوەی لە بەرهەمهێناندا دروست دەبێت.
هه‌روه‌ها وتوشیه‌تی، وەزارەت بەردەوامە لە هەماهەنگی لەگەڵ لایەنە پەیوەندیدارەکان بۆ بەدواداچونی په‌ره‌سه‌ندنه‌كانی دۆخەکە، بە شێوەیەک کە گەرەنتی گەڕانەوەی یەکەکانی بەرهەمهێنان بکات بۆ کارکردن بە توانای ئاسایی خۆیان.
وەزارەتی کارەبای عێراق داواشی لە هاوڵاتیان كردوه هاوکار بن لە دەستگرتن بە بەکارهێنانی وزەی کارەباوە لەم ماوەیەدا.