عەلی زەیدی، سەرۆکوەزیرانی عێراق پێشوازی لەو لێکگەیشتنە کرد کەلە نێوان بانکی ناوەندیی عێراق و وەزارەتی گەنجینەی ئەمریکا کراوە و دەڵێت "هەنگاوێکی گرنگ و ستراتیژیە".
ئاوێنە: ئەمڕۆ شەممە عەلی زەیدی لە پلاتفۆرمی "ئێکس" نوسیویەتی "شیاوکردنەوەی حەوت بانکی عێراقی بۆ گەڕانەوەیان بۆ کەناڵەکانی نێردراوی بانکی دەرەکی بە دراوەکانی دیکە، وەک ئامادەکارییەک بۆ بەدەستهێنانەوەی شایستەیی مامەڵەکردنیان بە دۆلاری ئەمریکی دوای تەواوکردنی مەرجەکانی پابەندبوون و حوکمڕانی، سەرکەوتنی ئەو رێگە چاکسازییە داراییە پیشان دەدات کە حکومەت گرتوویەتیەبەر".
زەیدی ئاماژەی بەوەشداوە، ئەو هەنگاوە "متمانە بە کەرتی بانکی عێراق بەهێزتر دەکات و ئاسۆیەکی فراوانتر لەبەردەم ئابووریی نیشتمانی و وەبەرهێناندا دەکاتەوە".
سەرۆکوەزیرانی عێراق جەختی لەسەر بەردەوامبوونی پشتیوانیکردن لە چاکسازییە دارایی و بانکییەکان و چەسپاندنی پرەنسیپەکانی شەفافیەت و حوکمڕانی کردەوە.
هەر لەوبارەیەوە نوسیویشیەتی "ئەو پشتیوانییە بە شێوەیەکە کە خزمەت بە بەرژەوەندییەکانی عێراق بکات و پێگەی ئابووریی وڵاتەکە لەسەر ئاستی ناوچەیی و نێودەوڵەتی بەهێزتر بکات".