مەرتەدی "ئیکۆ عێراق"ی تایبەتمەند بە کاروباری ئابووری، ئەمڕۆ یەکشەممە رایگەیاند کە کۆی بەرهەمهێنانی نەوتی عێراق لە نیوەی یەکەمی ساڵی 2026دا گەیشتووەتە نزیکەی 440.3 ملیۆن بەرمیل، لە کاتێکدا بەهۆی کاریگەرییەکانی جەنگی ناوچەکەوە، بڕی 302.8 ملیۆن بەرمیل لە بەرهەمهێنان فەوتاوە بەراورد بەو ئاستە سروشتییەی پێشبینی دەکرا.

ئاوێنە: ​بەپێی راپۆرتەکەی مەرتەدەکە، بەرهەمهێنانی نەوت لە مانگەکانی کانوونی دووەم و شوباتدا لە ئاستی ئاسایی خۆیدا بووە و تێکڕای رۆژانە 4.1 ملیۆن بەرمیلی تێپەڕاندووە، بەڵام لە مانگی ئادارەوە دابەزینێکی توندی بەخۆیەوە بینیوە. تێکڕای بەرهەمهێنانی رۆژانە لە کانوونی دووەمدا 4.097 ملیۆن بەرمیل و لە شوباتدا 4.140 ملیۆن بەرمیل بووە، پاشان بۆ 1.906 ملیۆن بەرمیل لە ئادار، 1.633 ملیۆن بەرمیل لە نیسان دابەزیوە، لە مانگی ئایاردا گەیشتووەتە نزمترین ئاستی کە 1.406 ملیۆن بەرمیل بووە، بەر لەوەی لە حوزەیراندا بەشێوەیەکی کەم روو لە بەرزبوونەوە بکات و بگاتە 1.525 ملیۆن بەرمیل.

​مەرتەدی "ئیکۆ عێراق" جەختی کردووەتەوە کە پێویستە چارەسەری ریشەیی بۆ پاراستنی کێڵگە نەوتییەکان و رێڕەوەکانی هەناردەکردن بدۆزرێتەوە، بەتایبەت لەڕێگەی گەشەپێدانی رێگەی بەدیل وەک پڕۆژەی "رێگەی شام"، بۆ ئەوەی سەقامگیریی بەرهەمهێنان مسۆگەر بکرێت و کەمترین زیان بە ئابووری عێراق بگات.

​لە لایەکی دیکەوە، شارەزایانی بواری وزە و جیۆپۆلیتیک هۆشداری دەدەن کە عێراق لە پلەی یەکەمی ئەو وڵاتانە دەبێت کە زیانیان پێ دەگات ئەگەر قەیرانی گەرووی هورمز بەردەوام بێت. روبن میلز، بەڕێوەبەری جێبەجێکاری کۆمپانیای "قەمەر بۆ وزە"، بە پشتبەستن بە داتا ناوخۆییەکانی S&P Global، ئاماژەی بەوە کردووە کە هێرشەکان بۆ سەر تانکەرەکان جوڵەی کەشتییەکان لە گەرووی هورمزی بۆ 16 کەشتی لە رۆژێکدا کەمکردووەتەوە.

​میلز پێیوایە بەدیلەکان، لەوانە هێڵە بۆڕییەکان، هێشتا ناتوانن قەرەبووی ئەو دابڕانە گەورەیە بکەنەوە، و پڕۆژەکانی عێراقیش لە رێگەی سووریا یان تورکیاوە پێویستیان بە دوو بۆ چوار ساڵ هەیە بۆ جێبەجێکردن. هەروەها هۆشداری دا لەوەی کە بەردەوامی ئەم دۆخە دەبێتە هۆی بەرزبوونەوەی هەمیشەیی نرخی نەوت، بەڵام لەبەرامبەردا داهاتی وڵاتانی بەرهەمهێنەر بەهۆی کەمبوونەوەی قەبارەی هەناردە و ئاستەنگەکانی گەیاندن دادەبەزێت. شارەزایان هۆشداریش دەدەن کە ئەم قەیرانە دەشێت خێرایی وەرچەرخانی جیهانی بۆ سەر وزەی نوێژەن و ئۆتۆمبێلی کارەبایی زیاتر بکات، ئەمەش ئاڵنگارییەکی درێژخایەن بۆ ئابوورییە پشتئەستوورەکان بە نەوت دروست دەکات.