به‌پێی میدیا عێراقییه‌كان، ئێوارەی ئەمڕۆ یه‌كشه‌ممه، دو هێزی ده‌سته‌ی ده‌ستپاكیی عێراق هه‌ڵیاكوتاوه‌ته سه‌ر باخه‌كانی شبل زه‌یدی، سه‌رۆكی هاوپه‌یمانی خزمه‌تگوزاری و ئه‌حمه‌د ئه‌سه‌دی، وه‌زیری پێشوی كار.
ئاوێنه: شه‌فه‌ق نیوز، له زاری سەرچاوەیەکی ئەمنيى عێراق ئاشكرایكردوە، لە دو ئۆپەراسیۆنی جیادا لە قەزای زەعفەرانیە لە باشوری بەغدا، دوو هێزی دەستەی دەستپاکی هەڵیانکوتایە سەر دو باخ، كە یەكێكیان شبل زەیدی، سەرۆکی هاوپەیمانی خزمەتگوزاری خاوەندارێتی دەكات و ئەوی تریشیان هی ئەحمەد ئەسەدی، وەزیری پێشوی کارو یەكێك لە سەركردە دیارەكانی چوارچێوەی هەماهەنگییه.
سەرچاوەكە راگەیاندووە، ئەو هێزەی هەڵیانکوتایە سەر باخەكەی شبل زەیدی لە قەزای زەعفەرانیە، بەدوای پارەدا گەڕاون، كە گومان دەکرێت لەوێ حەشاری دابێت.
ئاماژەی بەوەشکردوە، هێزێکی دیکە هەڵیانکوتایە سەر باخەكەی ئەحمەد ئەسەدی، لە هەمان ناوچە.
كەتائیبی ئیمام عەلی، كە لەلایەن شبل زەیدییەوە سەرۆكایەتی دەكرێت، یەكێك بو لەو سێ گروپەی بەم دواییەی چەكەكانی رادەستی حكومەتی عێراق كردو بەنیازە لە حكومەتی داهاتودا بەشداری پێبكرێت.
هاوكات ئەحمەد ئەسەدیش، كە یەكێكە لە سەركردە دیارەكانی ناو چوارچێوەی هەماهەنگی و وەزیری پێشوی كارەو فەرماندی گروپی جوندولئیماميشە، لە دوای دەنگۆی دۆزینەوەی 13 ملیۆن دۆلارو چوار كیلۆ ئاڵتون لە ئۆتۆمبیلێكدا لە ناوچەی سەوز كە دەوترێت خاوەندارییەكەی بۆ ئەسەدی دەگەڕێتەوە، دەنگى نەماوەو دەوترێت چوەتە دەرەوەی وڵات.