یەکەمین بەرهەمی نوێی ئەم ساڵی نووسەر دوکتۆر (حوسێن موحەممەد عەزیز)، کەوتە بازاڕەوە ...

ئەم بەرهەمە نوێیەی نووسەر، لە دووتوێی (264) لاپەڕە دایە. شایانی باسە، تا ئێستە بە گشتی، (56) بەرهەمی لە بوارە جیاجیاکانی (زمانەوانی، وێژەیی، ڕۆژنامەوانی، یاد و بیرەوەری، ساتیر، مێژوو، جوگرافیا و جیۆپۆلێتیک، کۆمەڵایەتی، ڕامیاری و نەتەوەیی)دا چاپ و بڵاوکردووەتەوە، بە هەمووشی (406. 12) لاپەڕەی نووسیوە.

سەرەتا بەرهەمەکە، بە پێشەکییەکی کورتی گرنگ دەستپێدەکا و هێندێ شتی ڕوونکردووەتەوە. پاشان بە سێ وتاری گرنگ و پێوەندیدار بە باسەکەوە، بابەتەکەی پتر دەوڵەمەترکردووە، وەک (وێژە و هۆنراوەی ڕامیاری، تراژیدیای ڕۆژە ڕەشەکان، ناوەڕۆکی هۆنراوەی نەتەوەیی و نیشتمانی).

پاشان لە هەموو ڕوویەکەوە، بەدرێژی باسی ژیان و بەرهەمەکانی، پێنج کەسایەتی و هۆنەری گەورەی وەک (مەلای گەورەی کۆیە - جەلیزادە، قانع، موفتی پێنجوێنی، موحەممەد ڕەسووڵ هاوار و فەرەیدوون عەلی ئەمین) کردووە. ناوەڕۆکی بەرهەمەکەش، لە ئەم بابەتانە پێکهاتووە: ناوی ڕاستەقینەی هۆنەرەکان و نازناوەکانیان، مێژووی ژیان و کارەکانیان، ئاستی ڕووناکبیری و خوێندەوارییان، خەباتی نەتەوەیی و نیشتمانی، دید و بۆچوونی تایبەتی، چەن نموونەیەک لە هۆنراوەکانیان و شیکردنەوەیان.

لە کۆتاییشدا، نووسەر ئەم چەن وشەیەی نووسیوە: (هیوادارم توانیبێتم، لە ئەم بەرهەمە نوێیەمدا، کەلێنێکی چکۆلانەم، لە وێژەی کوردیدا پڕکردبێتەوە. خوێنەرانی هێژای کوردیش بە گشتی، خوێندکارانی کۆلێژەکانی زمان و ویژەی کوردیش بەتایبەتی، کەڵکی لێ وەرگرن.)