ئەمینداری گشتیی بزووتنەوەی نوجەبا هەڵوێستی توندی خۆی سەبارەت بە ڕێگەچارەی دیپلۆماسی لە پەیوەندییەکانی لەگەڵ هەندێک وڵاتی ناوچەکە دەربڕی و ڕایگەیاند، گرتنەبەری دیپلۆماسی بێسوودە و وەڵامدانەوەی سەربازی بە پێویست دەزانێت.
ئاوێنە: ئەکرەم کەعبی، ئەمینداری گشتیی بزووتنەوەی نوجەبا (کە یەکێکە لە گرووپە چەکدارەکانی ناو بەرەی مقاوەمەی ئیسلامی لە عێراق)، لە ڕاگەیەندراوێکدا تیشکی خستە سەر هەڵوێستی بزووتنەوەکەیان سەبارەت بە پەیوەندییەکان و کردەوە سەربازییەکان. لە ڕاگەیەندراوەکەدا هاتبوو کە بژارەی دیپلۆماسی لەگەڵ ڕژێمی سعودیە هیچ ئەنجامێکی نابێت، بەو پێیەی بە بڕوای ئەوان، ئەو وڵاتە لە پشتی زۆرێک لەو پیلان و ئاڵۆزییانەوە وەستاوە کە عێراق و هاووڵاتییانی کردووەتە ئامانج، هەروەها جەختی لەسەر ئەوە کردەوە کە هێرشە مووشەکییەکان دەبێت تەنیا بە مووشەک وەڵام بپێدرێنەوە.
کەعبی ئاماژەی بەوەش کرد، ڕێگەی گونجاو بۆ بەرپەرچدانەوەی هەنگاوەکانی سعودیە، تەنیا لە ڕێگەی وەڵامێکی سەربازیی هاوڕێژەوە دەبێت، تاوەکو لەو ڕێگەیەوە بەرگری لە مافی ئەو کەسانە بکرێت کە لە ڕێزەکانی حەشدی شەعبیدا گیانیان لەدەستداوە.
لە بەشێکی دیکەی ڕاگەیەندراوەکەدا، پرسیار لەبارەی سەربووردە و قەرەبووکردنەوە داراییەکان کراوە و ئاماژە بەوە دراوە کە هیچ قەرەبوویەکی مادی ناتوانێت شوێنی زیانە مرۆییەکان بگرێتەوە یان هاوخەمییەکی ڕاستەقینە بۆ خێزان و کەسوکاری زیانلێکەوتووان فەراهەم بکات.
ئەم ڕاگەیەندراوە لە کاتێکدایە کە ئەو مۆڵەتەی پێشتر لەلایەن گرووپە چەکدارەکانەوە بە حکومەتی عێراق درابوو بۆ گرتنەبەری ڕێوشوێن بەرامبەر هێرشەکان بەکۆتا هاتوو، لەگەڵ ئەوەشدا ئەو گرووپانە ئاماژەیان بەوە کردووە کە لە ئێستادا وەڵامە سەربازییەکانیان دوادەخەن.