بەپێی ئەو بەڵگەنامە و زانیارییانەی لەلایەن سەرچاوە ئاگادارەکانەوە دراونەتە ئاژانسی ڕۆیتەرز، کۆمپانیای نیشتمانیی بەبازاڕکردنی نەوتی عێراق (سۆمۆ) تەندەرێکی نوێی بۆ فرۆشتنی نەوتی خامی بەسڕە بۆ مانگی ئەیلوولی داهاتوو ڕاگەیاندووە. مەرجی سەرەکیی ئەم تەندەرە بریتییە لەوەی کە پرۆسەی ڕادەستکردنی نەوتەکە بە کڕیاران لە دەرەوەی گەرووی هورمز جێبەجێ بکرێت.
ئاوێنە: لە لایەکی دیکەوە، سەرچاوە بازرگانییەکان پشتڕاستیان کردووەتەوە کە ئەمە دووەمین تەندەری لەم شێوەیەیە کە لەلایەن کۆمپانیای سۆمۆوە لە ماوەی تەنها یەک هەفتەدا بڵاو دەکرێتەوە.
سەبارەت بە وردەکارییەکانی چۆنیەتیی گواستنەوەکە، سەرچاوەکان ئاماژە بەوە دەکەن کە بارە نەوتەکە سەرەتا لە ڕێگەی کەشتییەکەوە دەگوازرێتەوە بۆ دەرەوەی گەرووی هورمز. دواتر لە کەناراوەکانی سوڵتاننشینی عومان، پرۆسەی ئاڵوگۆڕ پێکردن و گواستنەوەی نەوتەکە لە کەشتیی یەکەمەوە بۆ ناو کەشتییەکی دیکە (کەشتیی کڕیارەکە) ئەنجام دەدرێت.
ئەم هەنگاوەی سۆمۆ بە تەواوی جیاوازە لەو تەندەرەی کە پێشتر ڕایگەیاندبوو. لە تەندەری پێشوودا، کۆمپانیاکە داوای لە کڕیاران کردبوو کە خۆیان کەشتیی بارهەڵگر بەکرێ بگرن و لە کەناراوەکانی بەسڕەوە نەوتەکە بار بکەن. بەڵام لەم پێشهاتە نوێیەدا، خودی سۆمۆ بەرپرسیارێتیی تێپەڕاندنی نەوتەکە بەناو گەرووی هورمزدا دەگرێتە ئەستۆ و لە دەرەوەی ئەو ڕێڕەوە ڕادەستی کڕیارەکانی دەکات.
هۆکاری سەرەکیی گرتنەبەری ئەم ڕێکارە نوێیە پەیوەستە بەو داخستن و ئاستەنگانەی کە لە ئێستادا لە گەرووی هورمزدا هەن، کە وایکردووە کەشتییە بازرگانی و نەوتهەڵگرەکان نەتوانن بە ئاسانی بەو ڕێڕەوە ستراتیژییەدا تێپەڕ ببن. لەگەڵ ئەوەشدا، حکوومەتی تاران ڕەزامەندیی دەربڕیوە کە تەنها ئەو کەشتییانەی ئاڵای عێراقیان بەرز کردووەتەوە، بەبێ گرفت بە گەرووەکەدا تێپەڕ ببن. ئەم ڕێککەوتنەش دەرفەتی بە عێراق داوە کە لە ڕێگەی کەشتییە بەکرێگیراوەکانی خۆیەوە نەوتی بەسڕە بار بکات، بە سەلامەتی بیگەیەنێتە دەرەوەی هورمز و پاشان بیداتە دەست کڕیارەکانی.