محەمەد سەمعان ئاغا، وەزیری دەوڵەتی عێراق بۆ کاروباری پێکهاتەکان و سەرۆکی بەرەی تورکمان ئەمڕۆ هەینی ڕایگەیاند، پۆستەكەی نوێنەرایەتیی سەرجەم توركمانەكان دەكات و ئاشكرایكرد كە لە چەند ڕۆژی داهاتودا پارێزگارێكی نوێی بۆ كەرکوک لە پێكهاتەی توركمان دەستبەكار دەبێت.

ئاوێنە: محەمەد سەمعان ئاغا دوای وەرگرتنی پۆستی وەزیری لە لێدوانێكی بە ئاژانسی ئەنادۆڵی فەرمی توركیا ڕایگەیاند، وەزارەتەكەی تەنها نوێنەرایەتیی بەرەی تورکمانی ناكات، بەڵکو نوێنەری سەرجەم پارتە سیاسییەکانی توركمان و جوگرافیای تورکمانئەلییە و كار بۆ خزمەتکردنی تەواوی گەلی عێراق دەكات.

سەرۆکی بەرەی تورکمانی ئاماژەی بەوەداوە كە وەك وەزیرێكی توركمان بەشداری لە برەودان بە پەیوەندییەکانی نێوان عێراق و توركیادا دەكات. لە چوارچێوەی ئەو پرسە هاوبەشانەی وەک پڕۆژەی ڕێگەی گەشەپێدان، ئاو، وزە، بازرگانی و ئاسایش، ئەوان بە هاریکاری لەگەڵ وەزیرەکانی تری عێراقدا كار دەكەن تاوەكو هاوبەشیی ئابوری لە نێوان بەغداد و ئەنقەرەدا پەرەپێبدەن.

محەمەد سەمعان ئاغا لەبارەی پۆستی پارێزگاری کەرکوکەوە ڕایگەیاندوە، "بەڵێنی وەرگرتنی پۆستی پارێزگاری کەرکوکمان دابو کە 100 ساڵ بوە بەدەستمان نەهێنابو، ئێستاش لە چەند ڕۆژی داهاتودا ئەنجومەنی پارێزگا کۆدەبێتەوە و برایەکی توركمانمان ئەرکی پارێزگار دەگرێتە ئەستۆ، و لە قۆناغی دواتریشدا دەدرێتە عەرەب، با دڵی گەلەکەمان ئارام بێت".

لە چوارچێوەی ڕێککەوتنێکی سیاسیی پێشوەختەی یەكێتی و بەشێك لایەنە عەربیەكان و توركمان لە كەركوك بۆ ئاڵوگۆڕکردنی دەسەڵات لە نێوان پێکهاتەکانی شارەكە، ڕۆژی 16ـی (نیسان/4)ـی ئەمساڵ، محەمەد سەمعان ئاغا بە کۆدەنگیی ئەنجومەنی پارێزگا بە فەرمی وەک پارێزگاری نوێی کەرکوک ھەڵبژێردرا. ئەم ھەڵبژاردنە ڕاستەوخۆ دوای پەسەندکردنی دەستلەکارکێشانەوەی ڕێبوار تەھا، پارێزگاری پێشو ھات کە بەپێی ڕێککەوتنەکە پۆستەکەی جێهێشت، بەمەش محەمەد سەمعان بووە یەکەم کەسایەتیی تورکمان کە لە دوای زیاتر لە سەدەیەک (102 ساڵ) پۆستی پارێزگاری ئەو شارە وەربگرێت.