مەڕاسیمی دابەشکردنی خەڵاتەکانی ئۆسکار بەهۆی کۆرۆنا بۆ ٢٠٢١ دواخرا
  2020-06-16       216       

مەڕاسیمی دابەشکردنی خەڵاتەکانی ئۆسکار کە گرنگترین خەڵاتی بواری سینەمایە، بەهۆی ڤایرۆسی کۆرۆنای نوێ (COVID-19) بۆ نیسانی ٢٠٢١ دواخرا.
 
ئاوێنه‌: ئەکادیمیای زانست و هونەری سینەما لە روونکردنەوەیەکدا ئەوەی ئاشکرا کرد، ٩٣مین مەڕاسیمی دابەشکردنی خەڵاتەکانی ئۆسکار کە بڕیاربوو لە ٢٨ی شوباتی ٢٠٢١دا ئەنجامبدرێت، بەهۆی ڤایرۆسی کۆرۆنای نوێ (COVID-19) بۆ ٢٥ی نیسانی ٢٠٢١ دواخراوە.

لە روونکردنەوەکەدا ئەوەش خراوەتەڕوو کە ماوەی تۆمار کردنی کاندیدەکانی ئۆسکار بۆ ٢٨ی شوباتی ٢٠٢١ درێژکراوەتەوە.

جێی وەبیرهێنانەوەیە لە سەرەتای مانگی ئادارەوە ڤایرۆسی کۆرۆنای نوێ (COVID-19) لە ئەمریکا بڵاوبووەتەوە و بەهۆی ئەو رێوشوێنانەشی بۆ رێگری کردن لە بڵاوبوونەوەی ڤایرۆسەکە گیراونەتەبەر بەرهەمهێنانی فیلم وەستاوە.

کۆتا جاریش کە مەڕاسیمی دابەشکردنی ئۆسکار دواخرابێت لە ساڵی ١٩٨١دا بوو کە بەهۆی هەوڵدان بۆ تیرۆر کردنی سەرۆکی ئەو کاتی ئەمریکا رۆناڵد رەیگن، مەڕاسیمەکە بۆ ماوەی ٢٤ کاتژمێر دواخرابوو.
زۆرترین بینراو
© 2020 Awene Online, Inc. All Rights Reserved.
×