2021-09-05 497
حکومەتی هەرێمی کوردستان بڕیاریدا بە ڕاگرتنی سیمکارتی بێ فۆڕم و هەردوو وەزارەتی ناوخۆ و گواستنەوە و گەیاندن راسپێردران بۆ وەرگرتنی رێككاری پێویست بۆ قەدەغەكردنی مامەڵكردن بەو جۆرە سیمكارتانە كە هیچ سەرەتایەكیان نیە.
ئاوێنه: لە ڕاگەیەنراوێکدا وەزارەتی گواستنەوە و گەیاندنی هەرێم ڕایگەیاند، "لەژێر رۆشنایی بریار و راسپاردەی جەنابی سەرۆکی ئەنجومەنی وەزیرانی حكومەتی هەرێمی كوردستان، مەسرور بارزانی بریاری راگرتنی سیمكارتی بێ فۆڕم درا و وەزارەتی ناوخۆ و وەزارەتی گواستنەوە و گەیاندن راسپێردران بۆ وەرگرتنی رێككاری پێویست بۆ قەدەغەكردنی مامەڵكردن بەو جۆرە سیمكارتانە كە هیچ سەرەتایەكیان نیە."
ئاماژەی بەوەشکردووە، " لەمەودوا تەواوی زانیاری بەكارهێنەر و كڕیار دیار دەبێت، بەوەمەش بەمەبەستی رێگرتن لە تەشەنەكردنی دیاردەكە هەنگاوەكان دەست پێ دەكرێن بۆ بەیاساكردنی مامەڵەی هێلەكانی پەیوەندی لە هەرێمی كوردستان."
ئەوەشی خستووەتەڕو، "وەكو هەموو لایەك ئاگادارن ئێمە لە وەزارەتی گواستنەوە و گەیاندن بە هەماهەنگی تەواو لەگەڵ بەرێزان لە وەزارەتی ناوخۆ لەماوەی رابردوودا چەندین هەوڵی جدیمان داوە بۆ چارەسەركردنی ئەو دیاردەیە، لەو بارەیەوە چەندین كۆبوونەوە لەگەڵ لایەنە پەیوەندیدارەكان ئەنجامدراوە و لیژنەی تایبەتی بۆ دروستكراوە و بە بەشداری ئێمە و نوێنەرانی ئەنجومەنی وەزیران و سەرۆکایەتی وەزارەتی ناوخۆ."
لە ڕاگەیەنراوەکەدا ئەوەش هاتووە، "لەلایەكی دیكە بەدواداچوون و كۆبوونەوەی بەردەوام هەبووە لەگەڵ رێكخراوەكانی كۆمەڵگەی مەدەنی و بەرێوەبەرایەتی بەرەنگاربوونەوەی توندوتیژی خێزانی و ئەنجومەنی باڵای خانمان بۆ دۆزینەوەی رێگاچارەی گونجاو لەسەر ئەو پرسە و پرسی دیکە پەیوەست بە مافی مرۆڤ بە شێوەیەکی گشتی ومافی ئافرەتان وخانمان بە شێوەیەکی تایبەت."
ڕوونیشیکردووەتەوە، "لەرۆژانی داهاتوودا بۆ جێبەجێكردنی ئەو راسپاردەیە لیژنەكانی راسپێدراو لە وەزارەتی ناوخۆ و وەزارەتی گواستنەوە وگەیاندن كارەكان چڕتر دەكەینەوە بە هەماهەنگی تەواوی كۆمپانیاكانی بواری گەیاندن بەپێی یاسا و رێنماییەكان رێگری دەكەین لە مامەڵەكردن و بەكارهێنانی سیم كارتی بێ فۆڕم و ئەم پرۆسەیە بە شێوەیەکی یاسایی بە تەواوەتی رێکدەخری لە پێناو پاراستنی بەرژەوەندی گشتی."