لەکوێوە کارەساتەکە ھات لە ١٦ی ئۆکتۆبەرەوە یان لە ٢٥ی سەپتەمبەرەوە؟

بەهادین نوری
  2019-01-22     605
لەو ڕۆژەوە سوپای عێراق و میلیشیای شیعەی حەشدی شەعبی ھاتنەناو کەرکوک و ناوچەکێشە لەسەرەکان بەگشتی برادەرانی پارتی پرسی کوردیان کورت کردەوە لەیەک ڕستەدا: (خیانەتی ١٦ی ئۆکتۆبەر). بەبۆنەو بەبێبۆنە، بەدەم و بەقەلەم، کەوتنە باسی ١٦ی ئۆکتۆبەر، وەک بلێیت ئەمە نەبوایە ھەرێم سەربەخۆیی بەدەست ھێنابو!

بەڵێ لە ١٦ی ئۆکتۆبەر کارەساتێکی گەورە ھات بەسەر ئەم میللەتەدا . بەڵام ھۆکارو سەرچاوەی ئەم کارەساتە لەکوێوە ھات ؟ لە ١٦ی ئۆکتۆبەری ٢٠١٧وە ، یان ٢٥ سەپتەمبەری ٢٠١٧ ؟ ئەگەر مەسعود بەرزانی گوێی لە قسەو ھاواری ئۆپۆزسیونی وڵاتی خۆی بگرتایە ، ئەگەر داواو ئامۆژگاری ئەمریکا و ئەوروپا و ھەموو دنیایی بەھەند وەرگرتایە ، ئەگەر سیاسیەکانی ھەرێمی کۆبکردایەتەوە بۆ تاوو توێیەکی لۆژیکی – عەقڵانی ، لەباتی ئەوەی بە ملھوڕی بڵێ ( گوێ لە عبدالبشر ناگرم )، ئەگەر بەئەقڵیەتی شارستانی و دیموکراتی بجوڵایە لەباتی ئەقڵیەتی خێڵەکی و کوردایەتی عەمارەپوو .. ئەگەر وە ئەگەر .. ، ئەوکاتە ڕووبەڕووی ئەوشتە نە خوازراوە نەدەبووینەوە کەناودەبرێ بە (١٦ی ئۆکتۆبەر ) . واتە ١٦ی ئۆکتۆبەر زادەی ٢٥ی سەپتەمبەرە . ئەگەر ئەم ١٦ی ئۆکتۆبەرە خراپ بێ ئەوە پرژێکە لە خراپکاری ٢٥ی سەپتەمبەر.

من بە شان و باھۆی ١٦ی ئۆکتۆبەردا ھەڵنادەم بەڵام دەبێ ئەوڕاستیە بوترێ کە سەرتاپای کێشەکە دەستکردی ٢٥ی ئۆکتۆبەرە و سەرکردایەتی ئەو ٣ حیزبە بەرپرسیارن کە واژۆی بڕیاری ڕیفراندۆمە ناوەختەکەیان کرد ، لە پلەی یەکەمیشدا ئۆباڵی کارەساتەکە دەکەوێتە ئەستۆی بارزانی چونکە ھەرخۆی سەرقافڵە بوو.

من بەرگری لەوکەسانە ناکەم لە ١٦ی ئۆکتۆبەردا کە دەستیان خستەناودەستی سوپا و حیشدی شەعبی من دەزانم کە بەرپرسیارێتی یەکێتیش زۆر گەورەیە ، چونکە ئەگەر یەکێتی پێی داکوتایە لەسەر ڕەفزی ڕیفراندۆم ، لەباتی ئەوەی شوێن مسعود بکەوتایە ، ئەوە مسعودیش ناچار دەکرا پاشەکشە بکات لە پرۆژەکە . بەڵام ئەگەر ئەوانە بەخیانەتکار ناوببرێن ئەوە بڕیاردەرانی ڕیفراندۆم لە ٢٥ی سەپتەمبەردا سەدقات خایینترن ، چونکە ئەمانە بەرپرسیارن لە ھەموو کارەساتەکە.

من لە شۆڕەسوارانی ڕیفراندۆم دەپرسم : ئێوە ئەی برادەرینە ، کە ڕۆژی ١٤ی ئۆکتۆبەر لە دوکان کۆبونەوە بە بەشداری سەرکۆمار د.فواد معسوم کە بەغدا ناردبووی ، چیتان بڕیاردا ، ئاشتی یان جەنگ ؟ ئەوەتان بڵاو نەکردەوە کە ( دەبێ نەرمبین و ئاشتیانە کێشەکە چارەسەربکەین ) ؟ بەھەرحاڵ بێ کەھێزی چەکداری بەغدا بێت و ھێزی چەکداری ئێوەش لە شارەکەدابێ یەک لە دوو بژاردەتان لەبەردەمدایە : یان بەرەنگار بوونەوە ، واتە جەنگ ، یان پاشەکشە بۆ ئەوەی تووشی شەڕ نەبن . ئێوە بەدەستی خۆتان ، لەوچەند حەفتەی پێشتردا ، دۆخێکی وەھاتان دروستکردبوو کە بژاردەی سێھەم لە ئارادانەمینێ . دەبوو لە ڕۆژانی پێشتردا ھەوڵی جۆرێ لە ڕێکەوتنتان بدایە لەگەڵ بەغدا.

ئێوە لە ١٩٦١دا ئەم میللەتەتان ڕاپێچی شەڕێکی درێژخایەنی ماڵوێرانکەر کرد کە ھەواڵگری بەریتانیا ، بۆ ڕوخاندنی عبدالکریم قاسم ، دروستیکردبوو . ئەمجارەش ، بەکاریگەری عەقڵیەتی خێڵەکی و کوردایەتی عەمارەپوو ، خەریک بوون شەڕێکی نوێ بسەپێنن کە ئەنجامەکەی لە دەستدانی ئەو دەسکەوتانەی دوای جەنگی کەنداو و ڕاپەڕینی ١٩٩١ ھاتە دەست . ئەگەر بەتەنگ بەرژەوەندی گشتی ئەم گەلەوە بین دەبێ ١٦ی ئۆکتۆبەر بەپاشەکشەیەکی پێویست تەماشاکەین کە بۆچارەسەری ھەڵە کوشندە گەورەکەی ٢٥ی سەپتەمبەر پێویست بوو.

ئەگەر سەرکردایەتی پارتی ١٦ی ئۆکتۆبەر بە خیانەت دەژمێرێ ، ھەموو کەس دەزانێ کە ئەوپاشەکشەیە بەس لە کەرکوک نەبوو . دەپرسین ئەی بۆچی پارتی لە شنگال و مخمور و خانەقینیش پاشەکشەی کرد و ھیچ جووڵەیەکی نەبوو ؟ من بە باشی دەزانم کە جووڵەو بەرەنگاربوونەوەی نەبوو ، پێشم وایە کە ئامانج لەم ھەڵەشە و بەڵەشە لە ( خیانەتی ١٦ی ئۆکتۆبەر ) تەنھا بۆ ئەوە بوو کە سەرنجی ئەم خەڵکە لەسەر ٢٥ی سەپتەمبەر دوور خەنەوە . واتا پرسی ١٦ی ئۆکتۆبەر داتاشرا بۆ لەبیر بردنەوەی پرسە بنەڕەتیەکەی کێشە کەڵەکە بووەکانی دیکەی ھەرێم ، کە ھەموو دەستکردی حوکمڕانانی شکستخواردوی ٢٨ ساڵی ڕابوردووە.

سەرانی پارتی و یەکێتی ویەکگرتوو بەوعەقلیەتە خێڵەکیانە و کوردایەتی عەمارەپوو بەوەھمی سەربەخویی ھەرێم ، ھەلێکی مێژوویی زێرنیان لە کیسی ئەم میللەتەدا بۆھەوڵی جێبەجێکردنی مادەی {١٤٠} لە دەستور . ئەگەر چکێ لە گیانی شارستانێتی ھاوچەرخیان تێدابوایە دەستیان لەکاردەکێشایەوە و داوای لێبوردنیان لە میللەت دەکرد پاش ئەو کارەساتە گەورەیە ، بەلام ئەوان دەسەڵات بە موڵکی تاپۆداری خۆیان دەزانن ، بۆیە دوای کارە سات چڕتڕ لە جاران ھەڵبژاردنی پەرلەمانیان تەزویر کرد و ‌حوکرانیش خێڵەکیانە دامەزرێنرا : باوک کوڕ و برازا بوون بە مەرجەع و سەرۆک وەزیران و سەرۆکی ھەرێم.

شایانی باسەکە ھەموو حزبە بچووکەکانیش ، وەکو شیوعی و سۆشالیست و... ھتد ، بەشداربون لە پشتگیری لە ڕیفراندۆمدا . لە ٣ حیزبەکەی تری ئۆپۆزسیونیش گۆران و کۆمەڵ بە شەرمەوە ئۆپۆزسیون بوون و دوو پات و سێ پاتیان دەکردەوە کە ئەگەر دەنگدان بوو بە {بەڵێ} دەنگدەدەن ،واتە لە ریزی حوکمراناندا دەوەستن . تاکە رێخراوێ کە بەروونی و بەتەواوەتی دژی ریفراندۆم بوو ھەر نەوەی نوێ بوون ، 
ئەمرۆ حوکڕانان سوارن و میللەت پیادەیە ، بەڵام ئەمە کاتیە و ئەو ڕۆژە دوورنیە کە پێچەوانە بێتەوە.
زۆرترین بینراو
هۆکاری خێرابڵاوبونەوەی ڤایرۆسی كۆرۆنا لە جیهان دۆزرایەوە
خالید ره‌نجده‌ر: نیگه‌رانین مامۆستا كرێكار ڕاده‌ستی‌ ئه‌رده‌ن یان عێراق یان ئه‌مریكا كرابێته‌وه‌
رێژه‌ی مردن، باش و خراپی سیستمی ته‌ندروستی ده‌ره‌خات
"حكومه‌تی‌ هه‌رێم به‌نیازه‌ له‌مه‌ودوا 45 - 50 ڕۆژ جارێك موچه‌ دابه‌شبكات"
په‌رله‌مانتارێك بۆ به‌شیر حه‌داد: بەرنوێژیکردنی کۆمەڵگه‌ بەو شێوەیەی جەنابت، لای خوا قبوڵ نییە
هه‌شت په‌رله‌مانتاری‌ كورد له‌به‌غدا هۆشداری‌ ده‌ده‌نه‌ حكومه‌تی‌ هه‌رێم له‌باره‌ی‌ كه‌مكردنه‌وه‌ی‌ موچه‌
وه‌زیری‌ ناوخۆ ڕه‌تیده‌كاته‌وه‌ حكومه‌تی‌ هه‌رێم به‌نیازی‌ كه‌مكردنه‌وه‌ی‌ موچه‌ی‌ فه‌رمانبه‌ران بێت
وه‌زیری‌ ناوخۆ: بڕیارماندا قه‌ده‌غه‌كردنی‌ هاتوچۆ تا 10 رۆژی‌ دیكه‌ درێژبكه‌ینه‌وه‌
سوپای پاسدارانی ئێران بۆ له‌ناوبردنی كۆرۆنا هاوكاری ئه‌مریكا ده‌كات
موچه‌ی ژماره‌یه‌ك وه‌زاره‌ت و ده‌سته‌ دابه‌ش ده‌كرێت
© 2018 Awene Online, Inc. All Rights Reserved.
×