عەلی نیعمە مەندەلاوی ئەندامی لیژنەی ئاسایشو بەرگریی لهپهرلهمانى عێراق هەنگاوێکی حکومەتی عێراقی بۆ چارەسەرکردنی پرسی پێشێلکارییەکانی تورکیا لەهەرێمی کوردستان کە خۆی لەدروستکردنی بنکەی سەربازییو بۆردومانکردنی ڕۆژانەی ناوچەکە کە بەهۆیەوە هاوڵاتیانی مەدەنیی دەبنە قوربانیی، ئاشکراکردوە.
مەندەلاوی لەلێدوانێکی ڕۆژنامەوانییدا وتویەتی، "پێشێلکارییەکانی تورکیا لەناو خاکی عێراق مایەی نیگەرانی زۆرینەی هێزو لایەنە سیاسییەکانو هاوڵاتیانە، لەبەرئەوەی پێشێلکردنی سەروەریی عێراقە لەڕێگهی بەزاندنی سنورو بۆردومانکردنو بڵاوکردنەوەی بنکەی سەربازییو سیخوڕیی لەقوڵایی خاکی عێراق.
هەروەک دەڵێت:"لیژنەیەکی باڵا بەسەرۆکایەتیی قاسم ئەعرەجی ڕاوێژکاری ئاسایشی نەتەوەیی هەیە کە لەمدواییەدا دۆسیەی سنوریی لەگەڵ ئێران بەتایبەت ئەوەی پەیوەندیی هەیە بەدابینکردنی ئاسایشی هێڵی سنوریی کۆتایی پێهێنا، پێشبینیشدەکرێت هەر هەمان لیژنە کار لەسەر دۆسیەی سنورەکان لەگەڵ تورکیادا بکات".
ئەو ئەندامەی لیژنەی ئاسایشو بەرگریی ئاماژەی بەوەکردوە، لیژنەکەی ئەعرەجی سەردانی ئەنکەرە دەکات لەپێناو هەڵسەنگاندنو لێکۆڵینەوەی دۆسیەی سنورو پەسەندکردنی لێکتێگەیشتنەکان کە ببێتە هۆی کۆتاییهێنان بەپێشێلکارییەکانی تورکیاو چارەسەرکردنی دۆخی ئەو ناوچانە، بەشێوەیەک لەبەرژەوەندیی عێراقدا بێتو ڕێگریی لەهەر سەرپێچییو پێشێلکارییەک بۆسەر خاکی عێراق بکات.